भवानी अधिकारी
स्याङजा, २२ असार ।
अपांग समाज स्याङजा, गण्डकी प्रदेश सरकार पुलतीबजार नगरपालिका र स्कुल अफ डेमोक्रेसीको सहकार्यमा भिन्न क्षमता भएका ब्यक्तिहरुका लागि खाद्यान्न र स्वास्थ्य सामाग्री प्रदान गरिएको छ ।
पुतलीबजार नगरपालिका १ स्थित समाजको भवनमा भिन्न क्षमता भएका ब्यक्ति तथा उनीहरु आश्रित परिवारलाई ब्यक्तिगत सरसफाई, पोषण, खाद्यान्न तथा स्वास्थ्य सुरक्षा सामाग्री बितरण गरिएको हो ।
पुतलीवजार नगरपालिका वडा नं. १, २, ३, ४ र १४ नम्बरका अतिविपन्न र अति अशक्त १२ परिवारका लागि खाद्यान्न (२५ केजीको एक बोरा चामल, तेल, दाल, सोयावीन) सहित अन्य २० जना भिन्न क्षमता भएकाहरुलाई ब्यक्तिगत सरसफाई पोषण तथा स्वास्थ्य सामाग्री उपलब्ध गराइएको हो ।
वडा नं. १ र २ का अध्यक्षहरु निर्मल शेरचन र तिलकराम श्रेष्ठ, स्कुल अफ डेमोक्रेसीका अध्यक्ष अनुप श्रेष्ठ, गण्डकी प्रदेश संयोजक विमल रिमल, अपांग समाज स्याङ्जाका अध्यक्ष युवराज पराजुलीले उक्त सामाग्री प्रदान गरेका हुन् । कार्यक्रमको सहजीकरण समाजका सचिव राम शर्मा पाखेरेलले गरेका थिए । समाजले यसअघि पनि पुतलीबजारका अन्य वडाका ७६ जनालाई पनि खाद्यान्न सहित स्वास्थ्य सामाग्री उपलब्ध गराइसकेको छ ।
पुतलीबजार, भीरकोट, वालिङ, गल्याङ नगरपालिका र विरुवा गाउँपालिकामा पुगेर भिन्न क्षमता भएका ब्यक्ति तथा उनीहरुका पििरवारमा पुगेर खाद्यान्न सहित स्वास्थ्य सामाग्री प्रदान गरिसकेको र अन्य पालिकामा पनि पुग्ने तयारी भैरहेको समाजका अध्यक्ष पराजुलीले जानकारी दिए ।
