तिहारमा बालिएको मैनबत्तीबाट आगो सल्किँदा झापाको कमल गाउँपालिकामा गएराति एक बालिकाको मृत्यु भएको छ।
कमल गाउँपालिका-२ स्थित थापा गाउँका धु्रव परियारकी सात वर्षीया छोरी रेजुका परियारको जलेर मृत्यु भएको इलाका प्रहरी कार्यालय दमकले जनाएको छ।
बुबाआमा घरबाहिर रहेको बेला छोरी रेजुका मात्रै घरभित्र सुतिरहेको बेला मैन बत्तीबाट आगो सल्किएको थियो।
घरमा आगो दन्किएपछि घरभित्र रहेकी बालिकालाई बाहिर निकाल्न नसक्दा घटनास्थलमै बालिकाको मृत्यु भएको प्रहरी नायव उपरीक्षक विजयराज पण्डितले बताए।
आगलागीबाट परियारको इँटाको गारो र टिनको छानो भएको घर पूर्णरूपमा जलेर नष्ट भएको छ। आगलागीबाट करिब १५ लाख बराबरको क्षति भएको
प्रहरीले जनाएको छ।
आगो निभाउने क्रममा ग्यास सिलिण्डर पड्किएर स्थानीय २२ वर्षीय राम टुडु सामान्य घाइते छन्। स्थानीय बासिन्दा र दमकलको सहयोगमा आगलागी नियन्त्रणमा लिइएको पण्डितले बताए।
