प्याराग्लाइडिङमा पोखरा पछिको महत्वपूर्ण गन्तव्य स्वरेक मैदान

देव वोगटी
स्याङ्जा १२, साउन

विभिन्न संस्कृति तथा पर्यटनका थुप्रै सम्भावनाहरु बोकेका जिल्लाहरु मध्ये एक हो स्याङ्जा जिल्ला, ग्रामिण पर्यटनको विकास संगै प्याराग्लाइडिङको पनि उत्तिकै सम्भावना रहेको जिल्ला हो । नेपालमै ग्रामिण पर्यटनमा होम–स्टे सन्चालन गरेर मुलुकभर विशिष्ठ पहिचान वोकेको जिल्लामा कास्कीको सारङ्कोट पछि स्याङ्जाको स्वरेक मैदान साहसिक प्याराग्लाईडिङको महत्वपूर्ण गन्तव्य वन्न सक्ने देखिएको छ ।

संस्कृति, पर्यावरण तथा प्राकृतिक सम्पदाका हिसाबले अग्रस्थानमा रहेकाले आन्तरिक तथा बाह्य पर्यटनका लागि स्याङ्जा आकर्षणको केन्द्र विन्दु बन्दै गईरहेको छ । प्रशस्त सांस्कृतिक सम्पदा वाईसे चौविसे राजाका दरवारहरु, मठ, मन्दिर, प्राकृतिक वातावरणका हिसाबले सुन्दर यस जिल्लाका नदी, प्राकृतिक गुफा तथा भू–बनावटले जिल्लाको पूर्वदेखि पश्चिमसम्म जुनसुकै स्थानले पर्यटकिय सम्भावना वोकेका छन् । ग्रामिण पर्यटनको सुरुवात गर्ने सिरुवारी पछि अहिले जिल्लाको वालिङ नगरपालिका र भिरकोट नगरपालिका प्याराग्लाइडिङको लागि पोखरा पछिको महत्वपूर्ण गन्तव्य वन्न थालेको छ ।

पछिल्लो समय नेपाल घुम्न आउने साहसिक पर्यटकको प्रमुख रोजाइ प्याराग्लाइडिङ बन्दै गइरहेको छ । नेपालमै प्याराग्लाइडिङमा चर्चित पोखराको आकासमा सयौं मानिस उडिरहेका हुन्छन् । पोखरामा अन्तराष्ट्रिय विमानस्थन निर्माण संगै प्याराग्लाईडिङको पनि विकल्प खोज्नुपर्ने हुन्छ त्यसका लागि पनि पर्यटकिय नगरीको नजिकको स्थल भएकाले मैदान महत्वपूर्ण स्पोर्टको रुपमा रहन सक्ने पर्यटन व्यवसायीहरु वताउछन् ।

प्याराग्लाईडिङको विकास र स्थायीत्वको लागि जिल्लाका स्थानीय तह र पर्यटन सम्वन्धी काम गर्ने संस्थाहरु लागि परिरहेका छन् । दुईवटा विश्व कप समेत सम्पन्न गरिसकेको जिल्लामा यतिवेला प्याराग्लाईडिङ कम्पनी खोल्न आउने र आकासमा उड्न आउनेको संख्या दिनानुदिन वढिरहेको भिरकोट नगरपालिका वाड नं ५ का वडा अध्यक्ष यामप्रसाद अधिकारीले वताए ।

प्याराग्लाइडिङबाट स्याङ्जाका चर्चित पर्यटकीय तथा ऐतिहासिक स्थलहरुको मनोरम दृश्यावलोकन एकै पटकमा गर्न सकिने भएकाले र वास्तविक नेपालको भू–वनोटको अवलोकन गर्न सकिने भएकाले स्वरेकवाट उडने सबै पर्यटकले वेग्लै मज्जा लिने गरेको रामेछापवाट आएर स्वरेकमा प्याराग्लाइडिङ कम्पनी खोलेका पाइलट सानोवावु सुनुवारले वताए ।

पोखरा पछिको उडान देखि अवतरण सम्मका लागि अत्यान्त राम्रो र सिद्धार्थ राजमार्ग नजिकै भएकाले यस ठाँउ उपयुक्त मानेर आफूले फ्लाइङ हिमालयन प्याराग्लाईडिङ्ग कम्पनी खोलेर जिल्लामै पहिलो व्यवसायिक सेवा सञ्चालन गरेको समेत उनले बताए । उनका अनुसार नेपालमै पहिलो व्यवसायीक उडानको अनुमती पाएको पोखरामा सबैखाले उडानका लागि ठाँउ सानो भएकाले दुर्घटना दिनप्रति दिन वढ्दो छ । त्यसको लागि पनि पोखरावाट नजिकको स्पोर्ट स्वरेक मैदान भएकाले प्याराग्लाईडिङका लागि निकै उपयुक्त रहेको उनले वताए

पर्यटकको बाक्लो उपस्थिति जिल्लामा हुँदै गएकाले यहाँ होटल व्यवसायको खाँचो वढ्दै गइरहेको छ । उपयुक्त सडकमार्ग र आधारभूत पूर्वाधार निर्माण हुन सकेको खण्डमा दैनिक रुपमा बाह्य पर्यटकलाई समेत भित्राउन सकिने सम्भावना रहेको छ । प्याराग्लाइडिङ, दृश्यावलोकन, सुटिङ्गका लागि उपयुक्त ठाउँको रुपमा स्वरेक मैदान रहेपनि मुख्यतः सडक मार्ग र अन्य आधारभूत पूर्वाधारको अभावका कारण उचित विकास भने हुन सकेको छैन । पछिल्लो समय जिल्लाका पर्यटकिय सम्भावना रहेका स्थानहरुको जिल्ला पर्यटन विकास समिती र स्थानीय तहहरुले बृहत पर्यटकिय गुरुयोजना तयार गरेर पूर्वाधार विकासमा लागि परेका छन् ।

प्याराग्लाईडिङ भिरकोट नगरपालिकाको मैदानमा उडेर वालिङको पिङक सिटी, गह्रौकालिका, आँधीखोलाको मनोरम दृष्यावलोकन गर्न सकिन्छ । उता वालिङ नगरपालिकाले आँधीखोलाको किनारमा प्याराग्लाईडिङ र अल्ट्रालाईटलाई मध्येनजर गर्दै मझौला खालको एयरपोर्ट निर्माणगर्ने योजना बनाएको वालिङ नगरपालिकाले जनाएको छ ।

नेपालकै पर्यटकिय राजधानी पोखराको आडमा रहेको स्याङ्जा आफैमा पर्यटन विकासको निमित्त उपयुक्त जिल्ला हो । उपयुक्त पर्यटकीय स्थलहरुमा उचित पूर्वाधारहरुको विकास गरेको खण्डमा आन्तरिक पर्यटकसँगै बाह्य पर्यटकहरुलाई भित्राउन सकिन्छ । भौगोलिक अवस्थिति, प्राकृतिक एवं सांस्कृतिक तथा पुरातात्विक दृष्टिकोणले महत्वपूर्ण यहाँका पर्यटकीय क्षेत्रहरुको उचित विकास गर्न सकेको खण्डमा जिल्लाको आम्दानीमा समेत थप टेवा पुग्ने देखिन्छ ।