२५ मंसिर, काठमाडाैँ ।
सरकारले आगामी आर्थिक वर्षदेखि बाल सुधारगृह आफैँले सञ्चालन गर्ने निर्णय गरेको छ । सरकारका प्रवक्ता पार्वत गुरुङले यस आव २०७७/७८ पहिले सञ्चालन गरेको गैरसरकारी संस्थालाई सञ्चालन गर्ने निर्णय गरे पनि आगामी आवमा सरकारले नै बाल सुधारगृह सञ्चालन गर्ने बताए ।
“चालु आव २०७७÷७८ का लागि भक्तपुरको सानोठिमीस्थित बाल सुधारगृह र सोको विस्तारित शाखाका रुपमा रहेका कास्की, मोरङ तथा बाँकेस्थित बाल सुधारगृहको सञ्चालन र व्यवस्थापनको जिम्मेवारी न्यूनतम सुविधाविहीन बालबालिकाका लागि शैक्षिक कार्यक्रम (यूसेप नेपाल) सञ्चालन गर्न दिने निर्णय भएको छ”, उनले बुधबार सञ्चार मन्त्रालयमा पत्रकार सम्मेलनमा भने, “आगामी आवदेखि भक्तपुरको सानोठिमीस्थित बाल सुधारगृह र सोको विस्तारित शाखाका रुपमा रहेका कास्की, मोरङ तथा बाँकेस्थित बाल सुधारगृहको सञ्चालन र व्यवस्थापन सम्बन्धमा सङ्गठन तथा व्यवस्थापन सर्वेक्षण गरी आवश्यक जनशक्ति र सङ्गठन संरचनाको व्यवस्था गरी नेपाल सरकार आफैँले सञ्चालन गर्नेछ ।”
