कञ्चनपुर : पूर्व पश्चिम राजमार्गअन्तर्गत पर्ने कञ्चनपुरको बेदकोट नगरपालिका-१ चम्फापुर नजीक ट्रकले ठक्कर दिँदा एकजनाको मृत्यु भएको छ।
ट्रकले ठक्कर दिँदा मोटरसाइकल सवार प्रहरी हबल्दार ३६ वर्षीय रामबहादुर बिष्टको आइतबार घटनास्थलमै मृत्यु भएको हो।
महेन्द्रनगरबाट धनगढीतर्फ आउँदै गरेको से १ क १४०६ नम्बरको ट्रकले विपरीत दिशाबाट आउँदै गरेको लु १२ प ५१५ नम्बरको मोटरसाइकललाई ठक्कर दिएको हो।
प्रहरी हबल्दार बिष्ट भीमदत्त नगरपालिकाको झोलुङ्गे अस्थायी प्रहरी चौकीमा कार्यरत रहेको बताइएको छ।
ठक्कर दिने ट्रकका चालक गोदावरी नगरपालिका-१ का २८ वर्षीय यज्ञराज भट्टलाई प्रहरीले नियन्त्रणमा लिएको छ। जिल्ला प्रहरी कार्यालय कञ्चनपुर प्रहरी नायब उपरीक्षक अमरबहादुर थापा क्षेत्रीका अनुसार चालकमाथि अनुसन्धान सुरु भएको छ।
मृतक बिष्ट शुक्लाफाँटा नगरपालिका-११ का बासिन्दा रहेको खुलेको छ। रासस
