राजनीति, समाजसेवा र माटोको सुवास: फर्निचर व्यवसायीदेखि सिताके च्याउ उत्पादकसम्म ‘लक्ष्मण’को बहुआयामिक यात्रा
स्याङ्जा
राजनीति र समाजसेवालाई नागरिकसँग जोड्ने माध्यम मात्र मान्नेहरूका लागि स्याङ्जाका यामप्रसाद अधिकारी ‘लक्ष्मण’ एउटा उदाहरणीय नाम बनेका छन्। भीरकोट र वालिङको राजनीतिक-सामाजिक वृत्तमा छुट्टै पहिचान बनाएका नेपाली कांग्रेस स्याङ्जा क्षेत्र नं. २ (क) का नवनिर्वाचित प्रदेश सभापति अधिकारी यतिबेला राजनीतिसँगै माटोको सुवास र कृषि कर्ममा उत्तिकै तल्लिन छन्। भर्खरै सम्पन्न १५औँ महाधिवेशनबाट अत्यधिक मतका साथ प्रदेश सभापतिमा निर्वाचित अधिकारीको दैनिकी अचेल राजनीति, व्यापार, समाजसेवा र कृषिको सुन्दर समन्वयमा बितिरहेको छ।
फर्निचरको पहिचान र परिवारको बलियो साथ
वालिङलाई केन्द्र बनाएर सञ्चालन गरिएको ‘सफल फर्निचर’ स्याङ्जामै एक लोकप्रिय व्यवसायका रूपमा स्थापित छ। उद्यमशीलतामा नाम कमाएका अधिकारीको यो उद्योगले झन्डै एक दर्जन स्थानीय मजदुरलाई रोजगारी दिएको छ। उनी स्वयम् सामाजिक र राजनीतिक दौडधुपमा व्यस्त रहँदा फर्निचरका दुई वटा सोरुम उनकी श्रीमती र बुहारीले कुशलतापूर्वक सम्हाल्दै आएका छन्। पारिवारिक सहकार्य र दायित्व बाँडफाँडकै कारण उनी निर्धक्क भएर अन्य सामाजिक तथा कृषि कर्ममा समय दिन सफल भएका छन्।
संकटका साथी: जेसीज र लायन्सबाट राहत र उद्धार
बिहानैदेखि भीरकोट र वालिङका नेता, कार्यकर्ता तथा विभिन्न टोलका सर्वसाधारणसँग सुख-दुःख साट्न व्यस्त रहने अधिकारी सामाजिक संघ-संस्थामा पनि उत्तिकै सक्रिय छन्। जेसीज र लायन्स क्लबजस्ता प्रतिष्ठित सामाजिक संस्थामार्फत उनले देशभर जहाँसुकै विपत्ति पर्दा आफैँ पुगेर राहत र उद्धारमा खटिने कार्य गर्दै आएका छन्।
जंगलको साधनबाट अर्गानिक च्याउ: भीरकोटमा नयाँ प्रयोग
समाज र परिवारलाई उत्पादनशील काममा जोड्नुपर्छ भन्ने मान्यता राख्ने अधिकारीले भीरकोट–५ मा खेर गइरहेको जमिनलाई सदुपयोग गर्न सुरु गरेका छन्। एकातिर सुन्तला खेतीको विस्तार छ भने अर्कोतिर जंगलमा त्यसै खेर जाने कटुस र चिलाउनेका रूखहरूलाई सदुपयोग गर्दै औषधीय गुणयुक्त ‘सिताके च्याउ’ को व्यावसायिक खेती सुरु गरेका छन्।
सुरुवाती चरणमा नमुनाका रूपमा दुई वटा टनेलबाट सुरु गरिएको यो खेतीमा हाल १६ सय वटा मुडामा सिताके च्याउ लगाइएको छ। अहिले च्याउको दोस्रो चरणको उत्पादन भइरहेको छ र उनी दैनिक करिब ५० केजी च्याउ बजारमा पुर्याइरहेका छन्।
“उत्पादन गर्न सके बजारको कुनै समस्या छैन। अर्गानिक र औषधीय गुणले युक्त भएकाले सिताके च्याउ धेरैको रोजाइमा परेको छ। अहिले हामीले प्रतिकेजी ६ सय रुपैयाँमा बिक्री गरिरहेका छौँ। सामाजिक सञ्जालको माध्यमबाट अब यो च्याउ भीरकोट र वालिङमा मात्र होइन, देशका मुख्य शहरहरूसम्म पुर्याउने सोच छ।”
— यमप्रसाद अधिकारी ‘लक्ष्मण’
सुन्तला र च्याउबाट वार्षिक १० लाखको लक्ष्य
भीरकोट-५ का पूर्व वडाध्यक्ष समेत रहेका अधिकारीले गाउँका स्थानीयलाई कुनै न कुनै उत्पादनमूलक काममा जोड्न निरन्तर प्रेरणा दिइरहेका छन्। उनले वार्षिक ५ लाख रुपैयाँको सुन्तला र ५ लाख रुपैयाँको सिताके च्याउ बिक्री गर्ने स्पष्ट लक्ष्य राखेका छन्।
गाउँमा रहेको च्याउ फर्म र सुन्तला बगानको हेरचाह र रेखदेख मुख्य रूपमा उनका बुवा-आमाले गर्दै आउनुभएको छ। फुर्सद हुनासाथ उनी आफैँ पनि बारी र टनेलतिर उक्लिन्छन्।
“समयको अलि अभाव हुने भएकाले सोचेजति अझै राम्रो गर्न सकिरहेको छैन, तर पनि फुर्सद हुनासाथ कृषिमै रमाउँछु। गाउँका हरेक नागरिक कुनै न कुनै रूपमा उत्पादन र बजारसँग जोडिनुपर्छ भन्ने मेरो सन्देश हो।”
— अधिकारी
राजनीतिलाई सेवा, समाजसेवालाई कर्तव्य र कृषिलाई आत्मनिर्भरताको आधार मान्दै अघि बढेका यामप्रसाद अधिकारी ‘लक्ष्मण’ को यो कर्मशीलता धेरैका लागि प्रेरणाको स्रोत बनेको छ।
