वालिङमा २ हजार ५ सय १४ बालबालिकालाई भिटामिन ‘ए’ खुवाइयो

स्याङ्जा, जेठ ५ । वालिङ नगरपालिकामा हालै सम्पन्न भिटामिन ‘ए’ खुवाउने अभियान अन्तर्गत २ हजार ५ सय १४ जना बालबालिकालाई भिटामिन ‘ए’ क्याप्सुल खुवाइएको छ। वैशाख ६ र ७ गते सम्पन्न उक्त कार्यक्रम नगरपालिकाका ९९ वटा केन्द्रमार्फत सञ्चालन गरिएको थियो।

नगरपालिकाका स्वास्थ्य शाखा प्रमुख कमल पाण्डेका अनुसार सो अभियानमा ९९ जना महिला स्वास्थ्य स्वयंसेविकाहरू खटिएका थिए। सोही अवसरमा २ हजार २ सय ८२ जना बालबालिकालाई जुकाको औषधि पनि खुवाइएको पाण्डेले जानकारी दिए।

यसअघि गत कात्तिक महिनामा ३ हजार २ सय ४० बालबालिकाले भिटामिन ‘ए’ र २ हजार ९ सय ३३ जनाले जुकाको औषधि सेवन गरेका थिए।

६ देखि ५९ महिनासम्मका बालबालिकालाई भिटामिन ‘ए’ र एकदेखि ५ वर्षसम्मका बालबालिकालाई जुकाको औषधि निःशुल्क खुवाइन्छ। नेपाल सरकारले राष्ट्रिय पोषण कार्यक्रम अन्तर्गत हरेक वर्ष वैशाख र कात्तिक महिनामा भिटामिन ‘ए’ तथा जुकाको औषधि वितरण गर्दै आएको छ।

स्वास्थ्य शाखा प्रमुख पाण्डेका अनुसार सन् १९९३ देखि भिटामिन ‘ए’ र सन् २००१ देखि जुकाको औषधि खुवाउने कार्यक्रम सुरु गरिएको हो।