हिमदुत सम्वाददाता
वालिङ, १३ जेठ ।
नेपाल रेडक्रस सोसाइटी जिल्ला शाखा स्याङ्जाले जिल्लाका चार वटा नगर अस्पताललाई स्वास्थ्य सामाग्री प्रदान गरेको छ । कोभिड १९ को जोखीम बाट नागरिकलाई सुरक्षित राख्न सहयोग पुगोस भन्ने उदेश्यका साथ नेपाल रेडक्रस सोसाइटीद्वारा स्वास्थ्य सामाग्री उपलब्ध गराईएको नेपाल रेडक्रस सोसाइटी जिल्ला शाखा स्याङ्जाका मन्त्री दिनेश अर्यालले जानकारी दिए ।
हाल देशमा नयाँ भेरियण्ट सहितको कोरना भाईरसको संक्रमण समुदाय स्तरमा वढदै गइरहेको र स्थानीय पालिकाहरुले संक्रमण नियन्त्रण र न्युनिकरण अभियानलाई तिब्रताका साथ अघि बढाउने अभियानमा सहयोग पुगोस भन्ने उदेश्यका साथ स्वास्थ्य सामाग्री प्रदान गरेको मन्त्री अर्यालले जानकारी दिए ।
कोभिड १९ को जोखीम बाट नागरिकलाई सुरक्षित राख्न जापान रेडक्रस सोसाइटीवाट प्राप्त सहयोग झण्डै एक लाख ६० हजार वरावरको स्वास्थ्य तथा सरसफाई सामाग्री जिल्लाका पुतलीबजार नगरपालिकाको करेण्डाँडा स्वास्थ्य चौकी, भीरकोट नगर अस्पताल, गह्रौ प्राथमिक अस्पताल वालिङ र गल्याङ नगर अस्पतालमा संक्रमण नियन्त्रणका लागि आवश्यक पिपिइ, माक्स, स्यानीटाइजर, ग्लोव्स र सावुन हस्तान्तरण गरिएको नेपाल रेडक्रस सोसाइटी स्याङ्जाले जनाएको छ । जिल्लाका वाँकी स्वास्थ्य संस्थाहरुमा समेत स्वास्थ्य सामाग्री वितरण गर्दै जाने समेत जनाएका छन् ।
जस्तोसुकै विपतका वेला मानवीय सहयोगका लागि रेडक्रसको भूमिका अत्यान्तै प्रशंसा योग्य रहेको र गत वर्षवाट विश्वव्यापी महामारीको रुपमा फैलिएको कोरोना संक्रमण जिल्लामा पनि देखिएपछि नेपाल रेडक्रस सोसाइटी स्याङ्जा र विभिन्न उपशाखाले गरेको सहयोगवाट आफूहरु अत्यान्तै खुसी रहेको वालिङ नगरपालिका उप प्रमुख कल्पना तिवारीले वताईन ।
माक्सको अभाव भएका वेला स्थानीय तवरवाटै माक्स निर्माण गरी गरेको सहयोगदेखि संक्रमण नियन्त्रणका लागि जिल्ला शाखाका पदाधिकारीहरु हरेक पालिकामा पुगि क्वारेन्टीन र आइसोलेशन निर्माणमा गरेको सहयोगवाट अघिल्लो चरणको कोरोनावाट सहज अवतरण गर्न सफल भएको स्मरण गर्दै रेडक्रस जिल्ला शाखा र उपशाखाहरुलाई धन्यवाद समेत व्यक्त गरेकी थिइन् ।