धनगढी । नेकपा एमालेको सुदूरपश्चिम प्रदेश संसदीय दलको बैठकले तत्काल सरकारको समर्थन फिर्ता नलिने निर्णय गरेको छ ।
सुदूरपश्चिम प्रदेश सरकारबाट तत्काल हट्टन दिएको निर्देशन बाबजुद बुधबार बसेको संसदीय दलको बैठकले माओवादी केन्द्र नेतृत्वको सरकारको समर्थन कायमै राख्ने निर्णय गरेको हो ।
कोरोना महामारीको जटिल अवस्थामा कुनै विकल्प नभइ सरकारबाट बाहिरिनु उचित नभएको निष्कर्ष निकाल्दै तत्काल समर्थन फिर्ता नलिने र यसबारे सबै दलहरुसँग छलफल गर्ने निर्णय गरेको छ ।
सरकारबाट बाहिरीने विषयमा मंगलबार नै छलफल गर्न बैठक डाकिए पनि आन्तरिक विवादको कारण बैठक स्थगित भएको थियो । माधव समूहको बहुमत रहेको संसदीय दलमा एमालेको २५ सदस्य रहेको छ ।
त्यस मध्ये १८ जना पूर्वउपप्रधानमन्त्री भीम रावल पक्षका रहेका छन् । सुदूरपश्चिम प्रदेश सभामा सबैभन्दा ठुलो दल एमालेको सहयोगमा बनेको माओवादी नेतृत्वमा सरकार रहेको छ ।
नेकपा (एमाले)को जेठ १० गते बालुवाटारमा बसेको स्थायी कमिटीको बैठकले सुदूरपश्चिम प्रदेशको सरकारलाई दिएको समर्थन फिर्ता लिने निर्णय गरेको थियो । यस्तै माधव नेपाल सहित ११ जनालाई साधारण सदस्य समेत नरहने गरी पार्टीबाट निष्कासन गरेको थियो । स्थायी कमिटीलाई चुनौती दिंदै समर्थन फिर्ता नलिने निर्णय गरेपछि माओवादी नेतृत्वको सुदूरपश्चिम सरकारको संकट टरेको छ ।
बुधबारको बैठकमा २१ जना सहभागी थिए ।
