काठमाडौं । नेकपा एमालेका अध्यक्ष एवं प्रधानमन्त्री केपी शर्मा ओलीले पार्टीको स्थायी कमिटी बैठक बोलाएका छन् । प्रधानमन्त्री निवास बालुवाटारमा सोमबार दिउँसो १२ बजेपछि बस्ने केन्द्रीय कार्यलयका सचिव शेरबहादुर तामाङले बताए ।
बैठकमा पार्टी विरुद्ध माधव समूहको विपक्षी गठबन्धनसंग साँठगाँठ र सरकार विरुद्ध विपक्षी गठबन्धनको मोर्चावन्दीबारेमा छलफल केन्द्रीत हुने बुझिएको छ ।
यसअघि जेठ ८ बसेको स्थायी कमिटीले पार्टी हित विपरित विपक्षी गठबन्धनसंग मिलेर सरकरविरुद्ध गतिविधि गरेको आरोप लगाउँदै माधव नेपाल सहित उनका पक्षका ११ जनालाई स्पष्टीकरण सोध्ने निर्णय गरेको थियो । आइतबार केन्द्रीय कार्यलय सचिवमार्फत अध्यक्ष ओलीले ११ जनालाई तीन बुँदे स्पष्टिकरण पत्र पठाइसकेको तामाङले बताएका छन् ।
स्पष्टीकरण बुझाउन भनेर दिइएको समयअवधि पूरा भएकाले सोमबारको स्थायी कमिटीको बैठकले थप निर्णय लिन सक्ने अनुमान छ ।
स्पष्टिकरण सोधिएका नेताहरुमा माधव कुमार नेपाल, झलनाथ खनाल, भीम रावल, मुकुन्द न्यौपाने, रामकुमारी झाँक्री, कल्याणी खड्का, सरला यादव, पुष्पा कर्ण, लक्ष्मी चौधरी, कलिला खातुन र निरा जैरुलाई सोमबार बिहानसम्म स्पष्टीकरण बुझाउन भनिएको थियो ।
चैत ७ गते बसेको एमाले केन्द्रीय कमिटी बैठकले बरिष्ठ नेता माधवकुमार नेपाल, भीम रावल, सुरेन्द्र पाण्डे र घनश्याम भुसाललाई पार्टीहित विपरित गतिविधि गरेको आरोप लगाउँदै ६ महिनाको लागि पार्टीबाट निलम्बन गरिएको थियो । तर, बैशाख २७ गते प्रधानमन्त्री ओलीले संसदबाट विश्वासको मत लिने समयमा माधव नेपाल समूहका सांसदहरु बैठकमा अनुपस्थित रहेपछि अध्यक्ष ओलीले बैशाख २८ गते माधव नेपाल सहित चार जनामाथिको निलम्बन फुकुवा गरेका थिए ।
