काठमाडौं । नेपाल पत्रकार महासंघको बुधबार देशैभर सम्पन्न मतदानको मतगणना जारी रहेको छ । हालसम्म प्राप्त प्रारम्भिक चुनावी नतिजाअनुसार लोकतान्त्रिक–व्यवसायिक गठबन्धन अगाडि देखिएको छ भने सत्ता निकट पत्रकारको गठबन्धन पछि परेको छ । प्रारम्भिक नतिजाअनुसार केन्द्रमा विपुल पोखरेल प्यानलको अग्रता देखिएको छ भने निर्मला शर्मा प्यानल पछिपछि रहेको छ ।
यस्तै, महासंघ रुपन्देही शाखामा प्रगतिशिल लोकतान्त्रिक प्यानलका साझा उम्मेदवार रामराजा पोख्रेलको समुह विजयी भएको छ । पोख्रेल नेतृत्वको समुहले प्रेस चौतारी समुहका दिनेश पाण्डेको समूहलाई पराजित गरेको हो । पोखरेलले १६३ मत ल्याएर निर्वाचित बनेका छन् भने उनका प्रतिद्वन्दी पाण्डेले १२० मत प्राप्त गरेका छन् ।
अधिकांश स्थानमा सत्ता निकट गठबन्धन र माओवादी–काँग्रेस निकट लोकतान्त्रिक–व्यवसायिक गठबन्धनको प्यानल चुनावी मैदानमा थिए ।
यस्तै, पत्रकार महासंघको धनुषा र कास्की जिल्ला अध्यक्षमा पत्रकार महिला उम्मेद्वार विजय भएका छन् । बुधबार भएको निर्वाचनमा धनुषामा मनिका झा र कास्कीमा विमला भण्डारीको नेतृत्व चयन भएका हुन् ।
प्रेस संगठनबाट उम्मेद्वार बनेकी झाको नेतृत्वमा उपाध्यक्षमा अवधेश कामत, महिला उपाध्यक्ष नेहा झा, सचिव बटुकनाथ झा, सह–सचिवमा निरन्जन साह, सह–सचिव समावेशीतर्फबाट गोविन्द महतो, कोषाध्यक्ष राजकमल सिंह चयन भएका छन् ।
यस्तै कास्कीकी विमला भण्डारीले १७४ मत ल्याउँदै प्रतिद्वन्द्वी केवशशरण लामिछानेलाई हराएकी हुन्। महिलाले मात्रै सञ्चालन गरिरहेको रेडियो जननी कास्कीकी संस्थापक स्टेसन मेनेजर हुन् भण्डारी । उनी न्यूनतम पारिश्रामिक निर्धारण समितिकी सदस्य समेत हुन् ।
