काठमाडौं । प्रतिनिधिसभाको बैठक आज बस्दैछ। दिउँसो १ बजेका लागि बोलाइएको बैठकमा नेकपा माओवादी केन्द्र परित्याग गरेर नेकपा एमाले प्रवेश गरेका चार मन्त्रीको सांसदको पद खोसिने भएको छ । नेकपा माओवादी केन्द्रले कारबाही गरेका चार सांसद पदमुक्त भएको घोषणा गर्ने संसद सचिवालयको तयारी छ ।
माओवादी केन्द्रका संसदीय दलका नेता पुष्पकमल दाहाल प्रचण्डले सोमबार संसद सचिवायलाई पत्र पठाएर एमाले प्रवेश गरेका अर्घाखाँचीका टोपबहादुर रायमाझी, कैलाली–४ का लेखराज भट्ट, रौतहट–३ का प्रभु साह र कैलाली–३ का गौरीशंकर चौधरीले पार्टी परित्याग गरेको जानकारी दिएका दिए । सांसद पद खोसिने मन्त्रीहरुमा उर्जामन्त्री टोप बहादुर रायमाझी, उद्योग, बाणिज्य तथा आपूर्तिमन्त्री लेखराज भट्ट, सहरी विकासमन्त्री प्रभू साह र श्रम, रोजगार तथा सामाजिक सुरक्षामन्त्री गौरीशंकर चौधरी रहेका छन् ।
माओवादीका अन्य दुई मन्त्री मणिचन्द्र थापा र दावा लामा सांसद होइनन । गृहमन्त्री रामबहादुर थापालाई भने माओवादीले अहिलेसम्म कारवाही सिफारीस गरेका छैनन् । राजनीतिक दलसम्बन्धी ऐनअनुसार दल परित्याग गरेका सांसद पदमुक्त हुने व्यवस्था रहेको छ । संवैधानिक व्यवस्था अनुसार माओवादी तर्फका सात जनाको मन्त्री पद समेत धरापमा परेको छ । संविधानमा व्यवस्था भएअनुसार संघीय संसदमा सांसद नभएको व्यक्ति ६ महिनासम्म मन्त्री पदरमा रहनेछ ।
