काठमाडौं । नेकपा प्रचण्ड–माधव पक्षका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओली शिक्षक र बुद्धिजीवीहरुसँग तर्सिएको बताएका छन्। सोमबार एकिकृत अखिल नेपाल शिक्षक संगठन, प्रथम राष्ट्रिय परिषद बैठकलाई सम्बोधन गर्दै अध्यक्ष प्रचण्डले शिक्षक र बुद्धिजीवीहरु अन्धभक्त नहुने भएकाले ओली तर्सिएको बताएका छन् ।
प्रचण्डले भने ‘उहाँलाई चाहिने हनुमान, दास वा भक्त जे भनेपनि त्यस्ता अनधभक्त चाहिने रहेछ । शिक्षकहरु अन्धभक्त हुँदैनन् । उनीहरु विवेक प्रयोग गर्छन् र विश्लेषण गर्छन् । उनीहरु सत्य र न्यायको पक्षमा हुन्छन् । त्यसो भएकाले शिक्षकहरुलाई विचारबाट बाहिर राख्न चाहनुभएको रहेछ’ प्रचण्डको भनाई छ ।
प्रधानमन्त्री ओलीले प्रतिनिधि सभा विघटन गरेकै दिन पुस ५ देखि आफूहरू विरोधमा उत्रिएको उनको भनाइ थियो।
माघ २८ मा काठमाडौंमा हुने जनप्रदर्शनलाई व्यापक बनाउन प्रचण्डले आफूनिकटका शिक्षकहरूलाई आग्रह पनि गरेका छन्।
‘बढीभन्दा बढी जनता उठाउने, किनभने केपी ओली अब रक्षात्मक हुने अवस्थातिर गइसके,’ उनले भने, ‘पहिला धाकधक्कु धेरै लगाए तर छिरलेर मानिस राख्दा पनि उनकै सेक्युरिटीले ३० हजार ३५ हजार भन्दा धेरै थिएनन् भन्यो।’
