काठमाडौँ– प्रतिनिधिसभा विघटनको विरोधमा नेकपा ‘दाहाल-नेपाल’ निकट अखिल नेपाल स्वतन्त्र विद्यार्थी युनियनले काठमाडौँमा प्रदर्शन गरेको छ ।
अनेरास्ववियुका कार्यकर्ताहरुले काठमाडौंको नयाँबानेश्वरस्थित निषेधीत क्षेत्र प्रदर्शन गरेका हुन ।
संसद विघटनविरुद्ध चरणबद्ध आन्दोलनको घोषणा गरेका उनीहरुले बिहीबार अपराह्न बानेश्वरमा प्रधानमन्त्रीको पुत्ला दहन गरेका हुन ।
मिनभवनस्थित कमर्स क्याम्पसबाट प्रदर्शन गर्दै बानेश्वर पुगेर उनीहरुले पुत्ला दहन गरेका थिए ।
उनीहरुको प्रदर्शनमा प्रहरीले हस्तक्षेप गरेको थियो । त्यसलगतै उनीहरुले क्याम्पसबाहिर पनि प्रधानमन्त्रीको पुत्ला दहन गरेका थिए ।
त्यस्तै बिहीबार नै काठमाडौंको प्रदर्शनीमार्ग पनि अनेरास्ववियूका कार्यकर्ताहरुले मसाल जुलुस निकाल्नुका साथै प्रधानमन्त्रीको पुत्ला दहन गरेका छन् ।
रत्नराज्य लक्ष्मी क्याम्पसबाट प्रदर्शन गर्दै उनीहरुले प्रदर्शनीमार्गमा पुत्ला दहन गरेका हुन । सो क्रममा प्रहरीले हस्तक्षेप गरेको थियो । प्रदर्शनमा उनीहरुले संसद बिघटन असंवैधानिक भएको भन्दै निरन्तर आन्दोलन गर्ने बताएका थिए ।
