काठमाडौँ– नेपाली कांग्रेसका वरिष्ठ नेता रामचन्द्र पौडेललाई बुधबार पक्राउ गरेको विरोधमा तरुण दलले आज माइतीघरमा प्रदर्शन गरेको छ ।
बिहीबार माइतिघर मण्डालामा उपस्थित भएर तरुण दलका कार्यकार्ताले सरकार र प्रधानमन्त्री केपी शर्मा ओलीविरुद्ध नाराबाजी गरे । अध्यक्ष जितजंग बस्नेतको नेतृत्वमा भएको विरोधसभा प्रर्दशनकारीहरुले ‘भ्रष्टाचारी सरकार, मुर्दावाद’, ‘संवैधानिक दायित्व पूरा गर’ ‘शान्ति सुरक्षा कायम गर’लगायतका नारा लगाएका थिए।
यसैबीच नेता पौडेललाई पक्राउ गरेको विरोधमा भक्तपुरका कांग्रेस कार्यकर्ताले प्रधानमन्त्री केपी शर्मा ओलीको पुत्ला जलाएका छन्।
कांग्रेस भातृ संगठन तरुण दलको आयोजनामा भएको विरोधमा सभामा कांग्रेस भक्तपुर जिल्ला सभापति दुर्लभ थापा, जिल्ला कार्यसमिति भक्तपुरका पदाधिकारीहरू, महासमिति सदस्य र स्थानिय पार्टी कार्यकर्तासहितको उपस्थिति रहेको थियो ।
बुधबार तनहुँको ब्यास नगरपालिकाको पुलको उद्घाटन गर्न पुगेका पौडेललाई सत्तारुढ नेकपाको दबाबमा प्रशासनले तीन घण्टा नियन्त्रणमा लिएको थियो।
बुधबार उद्घाटन गर्न नपाए पनि पौडेलले बिहीबार दिउँसो उक्त पुलको उद्घाटन गरेका छन्।
