वालिङ, १५ माघ ।
वालिङ बसपार्कमा यही माघ ९ गतेवाट जारी ‘प्रथम वालिङ सास्कृतिक तथा पर्यटन रमाइलो मेला २०७६’ को सातौं दिन मंगलबार चर्चित लोकदोहोरी गायक पशुपती शर्माको बेजोड प्रस्तुती रह्यो । शर्माले आफ्ना चर्चित गीतहरु गाएर दर्शकलाई भरपुर मनोरञ्जन दिएका थिए ।
‘छिनछिन बज्ने चुरा, क्यार्न मया मारिचौ, लुट्न सके लुट कान्छा, मेरी आमालाई कोशी कान्छी बुहारी, स्याङजा जाने बाटैमा तनहुँ बिर्सिजाने मायालाई के भनौ’लगायतका चर्चित लोकदोहोरी गितहरु प्रस्तुत गरेका थिए । उनले गीत गाउन थालेपछि मेलामा उपस्थित दर्शकले चर्को स्वरमा उनको गीतमा साथ दिएका थिए ।
बुधबार उनी संगै चोलेन्द्र पौडेल, आधुनिक गायक रुपक डोटेलको प्रस्तुति रहेको थियो । वण्डरफूल वालिङको आयोजनामा पहिला देश अनि मात्र विदेश भन्ने नाराका साथ आयोजना गरेको मेलाको सातौं दिन स्थानीय मारुनी नाँच समेत प्रस्तुत गरिएको थियो । मेलामा नौमति बाजा प्रतियोगिता, खोला किनारमा खेलिने बिच भलिबल प्रतियोगिता समेत रहेको छ भने स्थानीय कृषि, पशु, हस्तकला लगायतका प्रदर्शनी रहेको छ ।
मेलाको सातौं दिनसम्म आइपुग्दा दर्शकको उपस्थिति उत्साहजनक पाइएको मेला आयोजक समितीका संयोजक आशिषप्रताप खाँणले जानकारी दिए ।
मौलिक संस्कृति र परम्परागत वस्तुहरुको प्रर्दशनी समेत गरिएको मेला विशेष गरेर पिङ्क सिटि वालिङ र वालिङ भित्रका पर्यटकिय सम्भावना रहेका ठाँउहरुको चिनारीका लागि मेला आयोजना गरिएको उनले बताए । स्थानीय यूवाहरुको सक्रियतामा वण्डरफूल वालिङ पर्यटन विकास समितीको आयोजना गरिएको पहिलो मेलाले आगामी दिनमा पनि थप काम गर्न उर्जा प्राप्त भएको संयोजक खाँणको दावी रहेको छ ।
यसैबीच मेलाको अाठौं दिन अर्थात भोलि विहिबार लोकदोहोरी गायिका भुमिका गिरी, दुर्गेश थापा, मेलोडी गायक रमेश श्रेष्ठ, नरजङ गुरुङ, लोक गायक रसिक अंगतको प्रस्तुति रहनेछ । भने ५ टिम पञ्चे बाजाको प्रस्तुति रहने प्रचार प्रसार समितीका संयोजक मणी अर्यालले जानकारी दिए ।