नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ले साढे दुई वर्षपछि केपी शर्मा ओलीले प्रधानमन्त्री पद नछाड्ने कल्पनै नगर्ने बताएका छन् ।
उनले विगतमा भएको सहमतिअनुसार अगाडि बढ्ने स्पष्ट पारेका छन् । रिपोर्टर्स क्लबका अध्यक्ष ऋषि धमलालाई दिएको अन्तर्वार्तामा प्रचण्डले सहमतिविपरित कुरा गर्न थालियो भने चिज अर्को ढंगले जाने बताए ।
केपी शर्मा ओलीले तपाई प्रधानमन्त्री बनाउनु होला ? तपाइलाई विश्वास छ ?
हामीले पार्टी एकता गर्ने संकल्प गर्र्यौ र चुनाव एउटै घोषणापत्र र साझा उम्मेदवारको रुपमा लड्यौं । नेपाली जनताले त्यसलाई राम्रोसँग अनुमोदन गर्यो र अहिले हामी एउटा राम्रो जिम्मेवारीमा छौं । अझ नेतृत्वको कुरा गर्दा म र कमरेड केपी ओली अध्यक्ष हुनुको नाताले अझ ठूलो जिम्मेवारीमा छौं । दोस्रो कुरा पार्टी एकता गर्दा हामीबीच सहमति भएकै छ । सहमतिबाट नै निर्णय गरेर पार्टीमा जानुपर्छ र सरकारको नेतृत्व पनि हामीले आलोपालो गर्ने भन्ने नै छ । हामीले लिखित नै सहमति गरेका छौं त्यो बाहिर नै आइसकेको छ । किताबमा छापिएर आइसकेको छ ।
त्यसो भए आलोपालोमा जाने सहमति भएकै हो ?
अँ त्यो सहमति हामीबीच भएकै छ । केपी जी र मेरो कुरा हुँदा हामी सहमतिअनुसार नै जाने भन्ने कुरा हामी प्रतिबद्ध छौं । त्यसकारण म अहिले आशंका गर्न पनि चाहन्न । र यो विषय फेरी के हो भने उहाँ(ओली) र म बीच सहमति भयो भने पाँचै वर्ष केपीजी नै प्रधानमन्त्री भए पनि हुन्छ ।
त्यसो भए तपाई केपी ओलीलाई पाँचै वर्ष प्रधानमन्त्री बनाउन तयार हुनुहुन्छ ?
होइन, मलाई प्रधानमन्त्री लिन हतारो पटक्कै छैन् । देशमा शुसासन र विकासले गति लियो र जनतामा सन्तुष्टी आयो भने मैले पार्टीलाई मुख्य रुपमा हेर्ने र अर्को अध्यक्षले प्रधनामन्त्री हेर्नेगरी काम मिलायो भने मलाई सहज हुन्छ । मलाई प्रधानमन्त्री नभई नहुने भन्ने मैले सोचेकै छैन् । मानिसहरु त्यसै होकी भन्छन् । मैले थोरै प्रधानमन्त्रीका कुरा निकाले भने प्रधानमन्त्री हुन बोलेको हो कि भन्ने मान्छेहरु पनि छन् । तर, मेरो त्यो कुरा होइन । राम्रोसँग पार्टी, सरकार रह्यो भने मलाई त्यो आलोपालो चाँहिदैन । पाँचै वर्ष केपीजी प्रधानमन्त्री भए पनि मलाई आपत्ति हुँदैन ।
तपाईं र ओलीको बीचमा साढे दुई वर्ष ओलीले नेतृत्व गर्ने । उहाँ प्रधानमन्त्री भैसक्नुभएको छ । साढे दुई वर्ष । त्यसपछि साढे दुई वर्ष तपाईं प्रधानमन्त्री । १५ महिना भैसक्यो । त्यसपछिको साढे दुई वर्ष तपाईं प्रधानमन्त्री बन्ने सहमति भएर पार्टी एकता भयो । यदि प्रधानमन्त्री केपी शर्मा ओलीले त्यतिखेर प्रधानमन्त्री पद छाड्नु भएन भने तपाईंले के गर्नुहुन्छ ?
जे हुन्छ सहमतिबाट हुनुपर्छ भन्ने हाम्रो छ । पार्टीले डिसिजन गर्ने कुरा हो । त्यस्तो कुराको अहिले म कल्पना गर्न चाहदिनँ । मैले प्रधानमन्त्रीजीलाई दुस्ख, सुख अप्ठ्यारोमा रक्षा गर्न मेरो ठाउँबाट बल गरिराखेकै छु। तपाईंहरूले देखिराख्नुभएकै छ । मैले सरकारको पक्षमा प्रधानमन्त्रीको पक्षमा जनताको बीचमा पब्लिक कार्यक्रममा पनि, सरकारले गरेका राम्रा कार्यक्रममा पनि के-के हुन् भनेर भनिराखेको छु । त्यसैले म अहिले तपाईंको यो प्रश्नमा जान चाहन्नँ । त्यसो गर्नु अहिले वास्तवमा उचित हुन्न । हामी सहज ढंगले कुराकानी गरिराखेका छौं । एकतादेखि अहिलेसम्म कहीँ हाम्रा कमीकमजोरी छन् भने समीक्षा गर्ने र सच्याउने तर्फ बल गर्नुपर्छ भन्नेतर्फ गैराखेका छौं । त्यसकारण भोलि (साढे दुई वर्षमा) छाड्नुहुन्न (प्रधानमन्त्री) भन्ने म कल्पना गर्न चाहन्नँ । यो विषय जे हामीले समझदारी गरेका छौं । त्यो समझदारी अनुसार जान्छ भन्ने विश्वासका साथ काम गर्ने भन्ने छ मेरो । यसरी नै बुझ्नुहोला । योभन्दा बढी यसमा नसोध्दा ठीक हुन्छ ।
दोश्रो सवाल जनताको सुशासन र विकास तथा समृद्धिको आकांक्षालाई सम्बोधन गर्ने कुरा हो । जनताले कम्युनिष्ट पार्टीको नेतृत्वको सरकार भएको बेला सुशासनको अनुभूति गर्यो कि गरेन ? यो एउटा सवाल हो भने अब जनताले देशमा विकास हुने भयो । भ्रष्टाचारमुक्त समाजतिर पनि यो अगाडि बढ्यो । विकास र समृद्धितिर पनि गयो । सरकार र पार्टी नेताको अर्को कुनै स्वार्थ छैन भन्ने जनताले बुझ्यो भने चिज एक ढंगले जान्छ ।
जनताले होइन भ्रष्टाचार त बढेको छ । चिज झन् उस्तै छ । विकास पनि भनेको जस्तो अगाडि आइराखेको छैन भन्ने ठान्यो भने परिस्थिति अर्को ढंगले जान्छ । कुरा बुझ्नुभयो त । पार्टी्भित्र छलफलले गर्दा हिजो जे सहमति भएको छ त्यो स्पिरिटमा अगाडि बढ्यौं भने चिज एक ढंगले जान्छ । त्यो सहमतिभन्दा विपरित कुरा गर्न थालियो भने चिज अर्को ढंगले जान्छ ।
म पार्टीको अध्यक्षको नाताले पार्टी एकता गर्न मुख्य भूमिका खेल्ने प्रस्तावकको नाताले यसलाई बचाउने, सुदृढ गर्ने, एकताको आधारमा टेक्ने, जे सहमति गरिएको हो त्यो इमान्दारिता साथ कार्यान्वयन गर्ने । के का लागि भन्दा देश र जनताका लागि । जनताको विकासको आंकाक्षाका लागि । तर त्योबाट दायाँबायाँ गर्यो भने त्यो टिक्नेवाला छैन भन्नेछ मेरो । मैले गर्न खोजें भने म पनि टिक्दिनँ । अर्कोले गर्न खोज्यो भने अर्को पनि टिक्दैन ।
हामी कसैले धेरै घमण्ड गरियो भने त्यो घमण्डको अन्तिम परिणति राम्रो हुँदैन । यो कुरा मलाई लाग्छ, हामी सबैले महसुस गरेका छौं ।
ओली र तपाईंबीचमा असझदारी बढ्यो । दूरी बढ्यो भन्नेहरू पनि छन् नि बाहिर ।
त्यस्तो होइन । हामीले सहमति कार्यान्वयनमा आवश्यक गम्भीरता र निर्णय लिँदा सम्पूर्ण रूपमा इमान्दार र पारदर्शी रूपमा छलफल र छलफलबाट निर्णय लिने प्रक्रियामा हामी गम्भीर हुनैपर्छ । त्यहाँ गम्भीर भएन भने स्थिति अप्ठ्यारोतिर जाने खतरा हुन्छ । तर हामी अहिले जसरी छलफल गरिराखेका छौं । त्यहाँ केपीजीसँग मेरो खुलेर छलफल हुन्छ ।
तीन चार दिन अगाडि बस्यौं । खुलेर मनमा लागेको कुरा भनियो । दुई जना मात्र बसेर । यसले के देखाउँछ भने एकता गर्दाको स्पिरिट, जनताले दिएको भरोसा विश्वास । हामीले एकले अर्कालाई दिएको भरोसा विश्वास तोड्ने होइन बलियो बनाउनेतर्फ जाने लाइनमा छलफल भएको छ ।
जनताको चाहनाअनुसार काम भएन भने नेतृत्व परिवर्तन हुन सक्छ ?
भएन भने त त्यो हुनसक्छ । त्यो त सहमतिअनुसार परिवर्तन गर्नु पर्ने स्थिति आउन सक्छ ।
माधवकुमार नेपाल बामदेव गौतम झलनाथ खनाल, नारायणकाजी श्रेष्ठको बीचमा एउटा सहमति भैसकेको छ रे । संसदीय दलको नेता परिवर्तन गर्ने केपी शर्मा ओलीलाई हटाएर तपाईं प्रधानमन्त्री बन्ने? त्यो निर्णय भएको हो ?
त्यो बिल्कुल गलत कुरा हो । सरकारलाई कसरी सफल पार्ने । पार्टी एकता कसरी सफल पार्ने भन्ने विषमा विभिन्न नेतासँग छलफल भएकै छ । यो कुरा माधव नेपाल, झलनाथ खनाल, नारायणकाजी श्रेष्ठ, वामदेव गौतम मेरोबीचमा मात्र होइन । मेरो र प्रधानमन्त्रीको बीचमा पनि छलफल सबैभन्दा धेरै हुन्छ ।
अहिले पनि उत्तिकै छलफल भैराखेको छ । मेरो र ईश्वर पोरखेलको बीचमा छलफल भैराखेको छ । मेरो र महासचिव विष्णु पौडेलको बीचमा त झन् डे टु डे कुराकानी भैराख्न पर्छ । भैराखेको छ । अहिले कुनै पनि छलफल सरकार हटाउने र अर्को सरकार बनाउने विषयमा केन्द्रीत भएर भएको छैन । सरकारलाई के गरी प्रभावकारी बनाउने पार्टी एकतालाई के गरी छिटोभन्दा छिटो राम्रो तरिकाले टुङ्ग्याउने । आजसम्म भएको छलफल यहाँसम्म सीमित छ । बाँकी सबै हल्ला हुन् ।
हेर्नुस भिडियो:
