काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले जनताका पक्षमा दृढ रहेर नेताहरुलाई आन्दोलित गराइराख्न युवा विद्यार्थीको महत्वपूर्ण भूमिका रहने बताएका छन् । बुधबार पाँच दलीय गठबन्धन निकट विद्यार्थी संगठनका अध्यक्षहरूसँगको ज्ञापनपत्र बुझ्दै अध्यक्ष प्रचण्डले विद्यार्थीहरुले परिस्थितिको सही मूल्याङ्कन गर्दा सही सूचना सम्प्रेषण हुने समेत बताए ।
प्रचण्डले केपी शर्मा ओली र आफूहरु कुनैपनि कोणबाट उस्तै नभएको स्पष्ट पार्दै विगतदेखिका नेपाली इतिहासका तथ्य र प्रमाणहरुले प्रष्ट गरेको बताए ।
‘सम्पूर्ण रुपमा आत्मसमर्पण गर्ने केपी शर्मा ओलीविरुद्ध विद्रोह गर्ने हामी र उनी उस्तै हुनै सक्दैन । २०१७ सालतिर केशरजंग रायमाझी सामन्तका पक्षमा लागे भने पुष्पलाल जनताको अधिकारका लागि लडे । दुबैलाई उस्तै भन्ने त ?’ प्रचण्डले प्रश्न गरे । उनले विद्यार्थीको प्रतिगमन विरोधी आन्दोलनमा आफूहरुको पूर्ण समर्थन रहेको भन्दै नेपाली जनतालाई आफ्नो सर्वभौम अधिकार प्रयोग गर्न नदिने डिजाइनको खलपात्र केपी ओली बनाइएको बताए । उनले ओली चारैतिर घेरामा परिसकेको भन्दै आफूहरु बलियो बन्दै गएको स्पष्ट पारे ।
प्रचण्डसँगको भेटमा विद्यार्थी नेताहरुले केपी ओलीको कुशासनको ठाउँमा सुशासनको अपेक्षा गरेको बताएका थिए । त्यसका लागि विद्यार्थीहरुले गर्ने अन्तरक्रियात्मक कार्यक्रममा सहभागी भइदिन अध्यक्ष प्रचण्डलाई आग्रह गरेका थिए । जनतामा छाएको निराशालाई आशामा परिणत गर्न नेताहरुले सार्वजनिक प्रतिवद्धता जनाउनुपर्ने विद्यार्थीहरुको आग्रह थियो ।
