काठमाडौं । उपप्रधान एवं शहरी विकासमन्त्री राजेन्द्र महतोले आफ्नो विवादास्पद अभिव्यक्ति सच्याएका छन् । मन्त्रिमा नियुक्त भए लगत्तै सिंहदरबारमा पदभार ग्रहणपछि सञ्चारकर्मीसंग नेपाललाई बहुराष्ट्रिय राज्य बनाउन मुक्ति आन्दोलन शुरु गर्ने विवादास्पद अभिव्यक्ति कारण चौतर्फी आलोचनाको शिकार भएका महतोले आफ्नो अभिव्यक्ति सच्याएका हुन् । शनिबार विज्ञप्ति जारी गर्दै उनले आफुले दिएको अभिव्यक्तिलाई बंग्याएर गलतरुपमा प्रचारप्रसार भएको भन्दै गम्भिर ध्यानाकर्षण भएको बताएका छन् ।
‘मैले संविधानको धारा ३ मा उल्लेख भए बमोजिम बहुजातीय, बहुधार्मिक, बहुसांस्कृतिक विशेषायुक्त भौगोलिक विविधतामा रहेका समान आकांक्षा र नेपालको राष्ट्रिय स्वतन्त्रता, भौगोलिक अखण्डताप्रति म पूर्ण प्रतिवद्धता रहेको छु’, मन्त्री महतोले उल्लेख गरेका छन् । उनले भनेका छन्, ‘राष्ट्रिय हित र समृद्धिप्रति आस्थावान रही एकताको सुत्रमा आवद सबै नेपाली जनता समष्टिमा राष्ट्र हो भन्ने विषयलाई आत्मसात गर्दै यो राज्य सबै जात,जाति, वर्ग, समुदाय, धर्म, लिङ्गको साझा राष्ट्र हो भन्ने आशय व्यक्त गरेको हुँ ।’ ‘यो संविधानमा हाम्रा रहेको असन्तुष्टि संवोधन गर्न संशोधनको निम्ति हाम्रा धारणा राख्ने नै छौं, विज्ञप्तिमा उल्लेख छ ।’
उनले राष्ट्रिय एकता र भौगोलिक अखण्डताप्रति कुनै भ्रम नराख्न विज्ञप्तिमार्फत प्रष्ट पारेका छन् ।
