काठमाडौं । नेकपा एमाले विभाजको मुखमा पुगेको अवस्थामा वरिष्ठ नेता माधव कुमार नेपाल समूहका युवा नेताहरुले राजनीतिक दल दर्ताको लागि निर्वाचन आयोगमा निवेदन दिएका छन् ।
नेपालले आफू निकट युवा नेता जीवन राईको नेतृत्वमा एक महिनाअघि नै निर्वाचन आयोगमा नेकपा ‘एकीकृत’ पार्टी दर्ता गराएका छन् ।
यो पार्टीले आयोगबाट पार्टी दर्ताको प्रमाण पत्र भने पाइनसकेको निर्वाचन आयोगका प्रवक्ता राजकुमार श्रेष्ठले बताए । ‘जीवन राईको अध्यक्षतामा नेकपा ‘एकीकृत’ पार्टी दर्ता गराउनु भएको छ । यसबारे हामी अध्ययनमै छौं’, उनले भने, ‘यो पार्टीले चुनाव चिन्ह कलम मागेको छ । पार्टी दर्ताको सबै प्रकृया पुगेको भए आवश्यक छानविन गरेर प्रमाण प्रत्र दिन्छौं ।’
संखुवासभाका राई माधव समूहका अनेरास्ववियूका पूर्व विद्यार्थी नेता समेत हुन् । गएको वैशाख ७ गते दल दर्ताको निवेदन परेपनि दर्ता हुने क्रममा रहेको निर्वाचन आयोगका प्रवक्ता राजकुमार श्रेष्ठले जनाएको छ ।
स्मरणीय कुरा के छ भने जेठ ६ गते सम्मपन्न भएको राष्ट्रिय सभा उपनिर्वाचनमा विपक्षी गठबन्धनबाट साझा उम्मेद्वार रहेका डा. खेमलाल देवकोटाले कलम चिन्हबाट चुनाव जितेका थिए ।
निर्वाचन आयोगका अनुसार राईले दर्ता गराएको पार्टीको उपाध्यक्षमा कल्पना गुरूङ र महासचिवमा विनोद कुमार खुलाल छन्। सचिवमा ऐन विक्रम कुँवर र कोषाध्यक्षमा सुशील खनाल छन्। राईको अध्यक्षतामा २५ सदस्यीय केन्द्रीय कमिटी रहेको आयोगले जनाएको छ ।
