काठमाडौं । जनता समाजवादी पार्टी (जसपा) अध्यक्ष महन्थ ठाकुरले अर्का अध्यक्ष उपेन्द्र यादवलाई थाहै नदिइ आफ्ना पक्षका सांसदहरुको बैठक बोलाएका छन् ।
अध्यक्ष महन्थ ठाकुर र वरिष्ठ नेता राजेन्द्र महतो पक्षको संसदीय दलको बैठक सुरु भएको छ। सिंहदरबारमा ठाकुर–महतो पक्षको बैठक बसेको हो। बैठकमा उपेन्द्र–बाबुराम पक्षलाई बोलाएको छैन ।
यस अघि अध्यक्ष द्वय ठाकुर र यादवबीच भएको सहमति विपरित गुटको भेला बोलाएको भन्दै यादव–भट्टराई पक्षले असन्तुष्टि जनाएको छ । यादव पक्षका नेता मोहम्मद इस्तिहाक राईले ठाकुर पक्षले बोलाएको सांसदहरुको बैठकबारे आफुलाई थाहा नभएको जवाफ दिएका छन् । ‘उहाँहरुले बोलाएको बैठक पार्टीको आधिकारीक बैठक होइन,’उनले भने, सहमतिको मसी सुक्न नपाउँदै गुटको भेला गर्नु पार्टी हितविपरित काम हो । त्यसले कसैलाई पनि फाइदा गर्दैन । गुटको निर्णय पार्टीलाई मान्य हुँदैन ।’
यसअघि जेठ तीन गते पार्टी अध्यक्ष द्वय यादव र ठाकुरबीच सके आफ्नै नेतृत्वमा सरकार गठन गर्ने नसके संयुक्त सरकार गठन गर्नुपर्ने निर्णय गरेको थियो । तत्काल सत्ता समिकरणमा नलाग्ने भन्दै प्रतिपक्षमा बस्ने दुई नेताबीच सहमति भएको थियो ।
बिहीबार प्रधानमन्त्री ओलीले संसदबाट विश्वासको मत नलिइ संविधानको धारा ७६(५) बमोजिम नयाँ सरकार गठन गर्ने निर्णय गरेपछि अध्यक्ष ठाकुर र महतो प्रधानमन्त्री निवास बालुवाटरमा गएर ओलीलाई भेटेका थिए । मधेशी दलले उठाएको मुद्दाको बारेमा अध्ययन गर्न कार्यदल गठन गर्ने सहमति गरेका थिए ।
ठाकुर र महतो पक्षबाहेकका सांसदहरुलाई भने बैठकको खबर गरिएको छैन । उपेन्द्र यादव–बाबुराम भट्टराई पक्षका एक नेताले आफूहरुलाई बैठकबारे जानकारी नभएको बताए ।
