स्याङ्जाको भीरकोटमा औषधि र खाद्यान्न पसलमा अनुगमन, म्याद गुज्रिएका औषधि भेटिएपछि कारबाही

स्याङ्जा, जेठ १२ – जिल्ला प्रशासन कार्यालय स्याङ्जाले भीरकोट नगरपालिका क्षेत्रका बयरघारी, वगरेबजार र हेलु बजारमा सञ्चालनमा रहेका औषधि तथा खाद्यान्न पसलमा अनुगमन गरेको छ।

सहायक प्रमुख जिल्ला अधिकारी दीपक पौडेलको नेतृत्वमा गरिएको अनुगमनमा म्याद गुज्रिएका औषधि बिक्रीका लागि राखिएको फेला परेपछि तीनवटा औषधि पसललाई जरिवाना गरिएको छ। बयरघारी बजारस्थित प्रशन्न मेडिको फर्मा र अमृत मेडिको फर्मालाई पाँच–पाँच हजार रुपैयाँ तथा वगरेबजारस्थित श्रेष्ठ ड्रग सेन्टरलाई छ हजार रुपैयाँ जरिवाना गरिएको जिल्ला प्रशासन कार्यालयले जनाएको छ।

सहायक प्रमुख जिल्ला अधिकारी पौडेलका अनुसार पटक–पटक अनुगमन गर्दा सुधार गर्न निर्देशन दिँदा पनि अटेर गरिएको पाइएकाले कारबाही गरिएको हो। कारबाहीमा परेका पसलहरूबाट म्याद गुज्रिएका औषधिहरू जफत गरी नष्ट गरिएको समेत उनले जानकारी दिए।

अनुगमन टोलीमा जिल्ला अस्पताल स्याङ्जाका प्रमुख डा. मोहन काफ्ले, प्रदेश जनस्वास्थ्य कार्यालयका जनस्वास्थ्य अधिकृत अस्मिता भण्डारी, पर्यटन तथा उद्योग कार्यालय स्याङ्जाका प्रमुख नारायणप्रसाद ढकाल, नेपाल पत्रकार महासंघ स्याङ्जाका अध्यक्ष प्रदीप कोइराला, उपभोक्ता हित संरक्षण मञ्चका अध्यक्ष राजेन्द्र मरासिनी लगायतको सहभागिता थियो।

“उपभोक्ताको स्वास्थ्यसँग खेलवाड गर्दै म्याद गुज्रिएका औषधि राख्ने कार्य उपभोक्ता संरक्षण ऐन विपरीत हो। त्यसैले कारबाही र अखाद्य वस्तु जफत गरिएको हो,” मञ्चका अध्यक्ष मरासिनीले बताए।