स्याङ्जा २ भदौ । वालिङ स्थित इलाका प्रशासन कार्यालयको भवन आईतवार नेपाल सरकारका गृह सचिव एकनारायण अर्यालले सुटुक्क वालिङ आएर उद्घाटन गरेका छन् ।
वालिङ नगरपालिका वाड नं ९ मा निर्माण गरिएको भवन उद्घाटन आईतवार गरिएपनि भवनमा लेखिएको ताम्रपत्रमा उद्घाटन मिति भने २०८१ असार २२ लेखिएको छ । पुरानो मितिको ताम्रपत्र १ महिना पछि सुटुक्क आएर उद्घाटन गर्दा गृह जिल्लामै गृह सचिव अर्याल विवादमा फसेका छन् ।
भवन उद्घाटनको तस्वीरमा गृहसचिव अर्याल, स्याङ्जा जिल्लाका प्रमुख जिल्ला अधिकारी, जिल्लाका प्रहरी प्रमुख, वालिङ नगरपालिकाका नगर प्रमुख सहित सरकारी कार्यालयका केही कर्मचारी र सुरक्षा निकायका प्रमुख मात्र सहभागी थिए ।
भवन उद्घाटन समारोहमा स्थानीय जग्गादाता समेत बेखवर भएकोमा जग्गादाताले समाजिक सञ्जाल मार्फत विरोध जनाएका छन् । भवन उद्घाटनको लागि जिल्ला प्रशासन कार्यालयले गत असार २२ गते दिन तय गरेको थियो । उक्त दिन जिल्लामा भिषण वर्षाका कारण कार्यक्रम स्थगित भएको थियो । ताम्रपत्र समेत ठिकठाक पारेको कार्यालयले आईतवार कसैलाई खवर नगरी सुटुक्क उद्घाटन गरेकोमा जग्गादाता, राजनैतिक दल, शुभेच्छुक लगायत पत्रकारहरुले प्रशासनको यो शैलीको विरोध जनाएका छन् ।
उता जिल्ला प्रशासन कार्यालय स्याङ्जाले सामाजिक संजालमा विरोधका भावहरु आउन थालेपछि खण्डन गर्दै ईलाका प्रशासन कार्यालय वालिङ स्याङ्जाको नवनिर्मित प्रशासनिक भवनलाई जग्गा प्रदान गर्ने जग्गादाताहरुलाई मिति २०८०/१२/०१ गते तत्कालिन ईलाका प्रशासन कार्यालय वालिङका शाखा अधिकृत श्री घनश्याम गौतमद्वारा सम्मान–पत्र सहित सम्मान गरिएको ।
तत्पश्चात ताम्रपत्र समेत तयार गरी मिति २०८१/०३/२२ गते औपचारिक कार्यक्रमका बिच श्रीमान् गृह सचिवज्यूबाट समुद्घाटन गर्ने कार्यक्रम तय भएकोमा मिति २०८१/०३/२१ गतेदेखि परेको अविरल भिषण वर्षाका कारण जिल्लामा ठूलो जनधनको क्षती भई सो कार्यक्रम स्थगित भएको र आज मिति २०८१/०५/०२ गते श्रीमान् गृह सचिवज्यूको यस जिल्लामा भएको अनौपचारिक कार्यक्रमको सिलसिलामा उक्त नव निर्मित भवनको समुद्घाटन भएको जानकारी फेसवुक पेजवाट गराएको छ ।
वालिङ ९ सुर्कौदी दरवार चोकमा स्थानीय खड्क कुमारी खाँण, धु्रवराज शर्मा, कपिलदेव शर्मा र विष्णुप्रसाद पंगेनीका परिवारले प्रशासन कार्यालयका लागि ४ रोपनी जग्गा निशुल्क प्रदान गरेका थिए । आफूहरुलाई उद्घाटनको जानकारी समेत नदिइ सुटुक्क उद्घाटन गरिएको प्रति अत्यान्त दुख लागेको जग्गादाता विष्णुप्रसाद पंगेनीले वताए ।
