स्याङ्जा –१० वैशाख ।
दुधको गुणस्तर कायम गर्ने उद्देश्यले जिल्ला प्रशासन कार्यालय स्याङ्जाले जिल्ला भित्रिएर उद्योगमा जाने दुधको ट्याङ्करवाट दुधको नमुना संकलन गरि परिक्षणका लागि खाद्य प्रविधि तथा गुण नियन्त्रण कार्यालय पोखरा पठाएको छ ।
जिल्ला प्रशासन कार्यालय स्याङ्जाका सहायक प्रमुख जिल्ला अधिकारी दिपक पौडेलको नेतृत्वमा जिल्ला प्रहरी कार्यालय स्याङ्जाका प्रमुख प्रहरी उपरिक्षक शालिग्राम शर्मा पौडेल, घरेलु तथा पर्यटन कार्यालयका प्रमुख, पुतलीवजार नगरपालिकाका प्रतिनिधि, नागरिक समाज, पत्रकार महासंघका अध्यक्ष सहित पत्रकारहरु, खाद्य प्रविधि तथा गुण नियन्त्रण कार्यालय पोखराको प्रतिनिधि सहित सिद्धार्थ राजमार्गवाट स्याङ्जा हुँदै पोखरा तर्फ जाँदै गरेको सुजल डेरी उद्योगको दुध वोक्ने ट्याङ्रवाट तिनवटा नमुना संकलन गरि परिक्षणका लागि पोखरा पठाइएको छ ।
विभिन्न उद्योगवाट जिल्लामा विक्रि वितरण हुने दुध र दुधजन्य पदार्थको गुणस्तर कायम गर्न राजमार्गहुँदै विभिन्न उद्योगमा जाने दुधको परिक्षण गरी गुणस्तरको वारेमा जानकारी लिन नमुना परिक्षणका लागि पठाइएको सहायक प्रमुख जिल्ला अधिकारी दिपक पौडेलले जानकारी दिए । नमुनाका लागि सुजल डेरी उद्योगको ग २ ख ४३७ नंवरको ट्याङ्करवाट नमुना संकलन गरि खाद्य प्रविधि तथा गुण नियन्त्रण कार्यालय पोखरा पठाइएको जानकारी दिए ।
परिक्षण पश्चात उक्त दुध गुणस्तरहीन प्रमाणित भएमा खाद्य ऐन अनुसार कारबाही प्रक्रिया अगाडि बढाउने जिल्ला प्रशासन कार्यालय स्याङ्जाले जनाएको छ । संकलन गरिएको नमुनाको रिपोर्ट ४८ घण्टामा आइपुग्ने खाद्य तथा गुण नियन्त्रण कार्यालय पोखराका प्राविधिक पुर्णकला थापाले जानकारी दिइन् ।
हाल जिल्लामा उपभोक्ता हित संरक्षणका लागि जिल्ला प्रशासन कार्यालय, जिल्ला प्रहरी कार्यालयले निगरानी वढाईरहेका छन् । कृषिजन्य तरकारीको आयतमा जिल्ला भित्रिने फलफूल तथा तरकारीमा विषादी परिक्षणको काम समेत जिल्ला भित्रिने नाका राम्दीमा सुरु भैसकेको तथा बजारमा विक्रि वितरण गर्ने उपभोग्य वस्तुहरुको समेत अनुगमन गर्ने कार्यक्रम रहेको जिल्ला प्रहरी कार्यालय स्याङ्जाका प्रमुख शालिग्राम शर्मा पौडेलले जानकारी दिए ।