काठमाडौँ । सर्वोच्च अदालतले प्रतिनिधि सभा विघटनविरुद्धको मुद्दामा कारण देखाउ आदेश जारी गरेको छ । बुधबार कारण देखाउ आदेश जारी गरेको हो ।
प्रधानन्यायाधीश चोलेन्द्रशम्शेर जबरा तथा न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा आनन्दमोहन भट्टराईको संवैधानिक इजलासले आज सो आदेश जारी गरेको हो ।
विघटनको मुद्दामा बहस गर्नका लागि १५ घण्टा समय तोकेको छ । रिट निवेदक पक्षका लागि १२ घण्टा र त्यसको जवाफ दिनका लागि विपक्षी पक्षका लागि ३ घण्टा समय तोकेको छ । संवैधानिक इजलासले सबै विपक्षी लिखित पेस गर्नसमेत आदेश दिएको छ । उक्त आदेशमा ७ दिनभित्र जवाफ पेस गर्न भनिएको छ ।
त्यस्तै इजलासले एमिकस क्युरीको माग गरेको छ । इजलासले नेपाल बार एशोसिएसनबाट २ जना र सर्वोच्च अदालत बार एशोसिएसनबाट २ जना माग गरिएको छ । एमिकस क्युरीका एक जनाले बढीमा आधा घण्टा गरी दुई घण्टा बहस गर्न पाउने आदेशमा उल्लेख गरिएको छ ।
इजलासले उक्त विवादमा आगामी असार ९ गतेदेखि निरन्तर सुनुवाइ गर्ने तय गरेको छ । आज रिट निवेदकका तर्फबाट वरिष्ठ अधिवक्ताद्वय शम्भु थापा र महादेव यादवले बहस गरेका थिए ।
रिट निवेदकहरुले राष्ट्रपति, प्रधानमन्त्रीलगायतलाई विपक्षी बनाइ रिट दिएका थिए ।
