काठमाडौं । रहस्यमय नारायणहिटी दरबार हत्याकाण्ड भएको आज २० वर्ष पूरा भइ २१ वर्षमा प्रवेश गरेको छ ।
२०५८ जेठ १९ गते शुक्रबारसाँझ त्रिभुवन सदनमा राजपरिवारका सदस्यहरुको नियमित पारिवारिक जमघटमा व्यस्त थिए । सोही समयमा एक्कासी गोलिकाण्ड चल्दा नाराहीटी राजदरवारभित्रै तत्कालीन राजा वीरेन्द्र शाहको वंश नाश हुनुको साथै राजपरिवारका १० जना सदस्यहरुको निधन भएको थियो ।
नेपालको आधुनिक इतिहासमा राजपरिवारको वंशै नास हुने गरी कहालिलाग्दो रहस्यमय हत्याकाण्ड भएको २० वर्ष पुरा भइसक्दा समेत घटनाबारे सत्य तथ्य अझै बाहिर आउन सकेको छैन ।
हत्याकाण्डपछि तत्कालीन प्रधानन्यायाधीशको संयोजकत्वमा सभामुख र विपक्षी दलका नेता रहने गरी तीन सदस्य उच्चस्तरीय छानबिन समिति गठन भएको थियो । निष्पक्षतामाथि प्रश्न उठाउँदै विपक्षी दलका नेता माधव नेपाल बहिरिएपछि दुई सदस्य उच्चस्तरीय समितिले हत्याकाण्ड तत्कालीन युवराज दीपेन्द्रले गरेको प्रतिवेदन सार्वजनिक गरिएको थियो । तर, आम जनताले दरबार हत्याकाण्डमा युवराज दिपेन्द्रले गराएकोमा अझैसम्म पनि विश्वास गर्न सकेका छैनन् ।
हत्याकाण्डमा तत्कालीन राजा वीरेन्द्र, रानी ऐश्वर्य, युवराज दीपेन्द्र, राजकुमार निराजन, राजकुमारी श्रुति, राजकुमार धिरेन्द्र, राजकुमारी जयन्ती, राजकुमारी शान्ती, राजकुमारी शारदा, कुमार खड्का लगायतका राजपरिवारका सदस्यहरूको गोली प्रहार गरी हत्या भएको थियो । सो हत्याकाण्डमा रानी रत्नराज्य लक्ष्मी सहित पूर्वराजा ज्ञानेन्द्रको सवपरिवार सकुशल रहेका थिए ।
तत्कालिन राजाहरुमध्ये राजा वीरेन्द्र शान्तिप्रेमी, विकासप्रेमी र जनभावना अनुसार चल्नुपर्छ भन्ने मान्यता राख्ने राजाको रुपमा चिनिन्छन् । बीसौं वर्ष वितिसकेको छ । मुलुक राजतन्त्रबाट गणतन्त्रमा प्रवेश गरिसकेको छ । तरपनि हत्याकाण्डको वास्तविकता छानविन गरी सार्वजनिक गर्न कुनै सरकारले चासो दिएको छैन ।
