काठमाडौं । नेकपा एमालेका नेता एवं पूर्वप्रधानमन्त्री माधव कुमार नेपालले संसद विघटन र निर्वाचनको घोषणा प्रतिगमन भाग २ भएकोले डटेर प्रतिवाद गर्न आग्रह गरेका छन् ।
शनिवार बिहान सामाजिक सञ्जाल मार्फत आफ्नो बिचार सार्वजनिक गर्दै नेता नेपालले षड्यन्त्रकारीहरूको उक्साहट र चाहनामा फेरि पनि संसद्को चीरहरण भएको बताएका छन् । संविधानको मर्ममाथि प्रहार गर्दै सर्वसत्तावाद लाद्ने उदेश्यले कथित चुनाव घोषणा जालझेल भएको बताए ।
‘फेरी प्रतिगमन दोहोरिएको छ । यो व्यवस्था नै कू’ गर्ने अग्रसरता हो,’ नेता नेपालले लेखेका छन्, ‘शीतल निवासले संविधानको मर्मलाई कुठाराघात गरेको छ । यो प्रतिगमन भाग २ हो । केपी ओलीको यो कदमको भर्त्सना गर्दछु । यसको प्रतिवाद डटेर गर्न आह्वान गर्दछु !’
