काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवाले सरकार गठन प्रकृयाबारे छलफल गर्न गठबन्धन दलका शीर्ष नेताहरुको बैठक बोलाएका छन् ।
प्रधानमन्त्री केपी शर्मा ओलीले सोमबार संसदबाट विश्वासको मत गुमाएपछि राष्ट्रपति विद्यादेवी भण्डारीले संविधानको धारा ७६ (२) अनुसार सरकार गठनका लागि दलहरूलाई आह्वान गरेपछि देउवाले यसबारे छलफल गर्न बैठक राखेका छन्।
देउवा निवास बुढानिलकण्ठमा मंगलबार दिउँसो २ बजे बैठक बस्न लागेको देउवाका सहयोगी भानु देउवाले बताएका छन् । बैठकमा कांग्रेसका शीर्ष नेता, नेकपा माओवादी केन्द्र, जसपालगायत दलहरूका शीर्ष नेतालाई छलफलका लागि बोलाएका हुन्।
सोमबार प्रधानमन्त्री ओलीले संसदमा विश्वासको मत रहेको छ भन्ने प्रस्तावको पक्षमा ९३ मात्र मत परेको थियो । विपक्षा १२४ मत परेको थियो । संसदमा हाल कायम रहेको २७१ को बहुमत संख्या १३६ पुर्याउन नसक्दा प्रधानमन्त्री ओली सोमबार नै पदमुक्त भएका थिए । मतविभाजनमा उनकै दलका २८ सांसदले भोट हालेका थिएनन् भने जसपा महन्त ठाकुरका १५ सांसद तटस्थ बसेका थिए ।
राष्ट्रपति भण्डारीले दिएको तीन दिन समय सीमाभित्र विपक्षी गठबन्धनले बहुमत सिद्ध गर्न नसके संविधानको धारा ७६ (३) अनुसार संसदमा रहेको ठुलो दल नेकपा एमालेकै नेतृत्वमा सरकार बन्ने प्रकृया अघि बढ्ने छ ।
