हिमदुत डेक्स
स्याङ्जा, २५ वैशाख ।
कोरोना नयाँ भेरियन्ट सहितको संक्रमणवाट देशका विभिन्न जिल्लाहरुमा निषेधाज्ञा गरिएको छ । संक्रमणको दर दैनिक वढिरहेको अवस्थामा देशका साना तथा ठूला सहर बजारमा रहेका अस्पतालमा विरामीको उपचारका लागि वेडको अभाव हुनुका साथै विरामीलाई अक्सिजनको समेत अभाव भइरहेको छ ।
माहामारीको कारण अन्य जिल्लाहरुमा जस्तै स्याङ्जा पनि प्रभावित वन्न पुगेको छ । जिल्लाका ११ वटा पालिकाले महामारी नियन्त्रणका लागि र विरामीको उपचारको लागि हर सम्भव पहल गरिराखेका छन् । पालिका मात्र नभई जिल्लामा क्रियाशिल सामाजिक संघ संस्थाहरु पनि मानवीय सेवामा सक्रिए भएर लागेको पाइएको छ ।
माहामारी नियन्त्रणका लागि भिरकोट नगरपालिकामा भीरकोट जेसीजले सन्चालन गरेको विपतमा हामी अभियान साँच्चै उदाहारणीय वन्दै आइरहेको छ । १८ वर्ष देखि ४० वर्ष सम्मका यूवाहरुको नेतृत्व र व्यक्तित्व विकासका लागि स्थापित जेसीजले विभिन्न समयममा आइपर्ने विपतका वेला समुदायको सहयोगी भूमिका निर्वाह गर्दै आइरहेको छ ।
कोरोना महामारीको सुरुवातीमा राहत, उद्दार र सचेतना जस्ता कार्यक्रम सन्चालन गर्दै समुदायमा उत्कृष्ट कार्य गरेको भीरकोट जेसीजले यस वर्ष नयाँ भेरियण्ट सहितको कोरोना माहामारी नियन्त्रण र व्यवस्थापनमा युवाहरुको क्रियाशिलता पनि उत्तिकै प्रभावकारी वनेको छ ।
विपतका वेला मानवताको सेवा जीवनको सर्वोत्तम कार्य हो भन्ने मुल मन्त्र हामी जेसीजमा लागेका यूवाहरुले विर्सन नहुने भन्दै समाजप्रति आफूहरु उत्तरदायीत्व हुनुपर्छ भनेर यसपटक विपतमा हामी अभियान सन्चालन गरेको भीरकोट जेसीजका अध्यक्ष प्रशुन मगरले जानकारी दिए ।
उनका अनुसार कोरोना संक्रमणको दर उच्च छ विरामीहरु गाँउमै उपचार नपाएर वा अस्पतालको सेवा नपाएर दु:ख पाउन नपरोस साथै जेसीजले स्थानीय सरकारले संक्रमण नियन्त्रणका लागि गरेको निर्णयलाई कार्यन्वयनका लागि सहयोगी भूमिका निर्वाह गर्न र दु:खमा परेका जो कोहीलाई राहत र उद्दारका लागि जेसीजले अभियान सन्चालन गरेको उनले वताए ।
भीरकोट जेसीजले अभियान अन्तरर्गत नगरपालिकामा जनचेतनाका लागि माक्स तथा सेनीटाइजरको प्रयोग, सामाजिक दुरी कायम, अत्यावश्यक वाहेक घर वाहिर ननिस्कन आग्रह गर्दे घर घरमा पोस्टर तथा पर्चा वाड्दै हिडेको छ । भने विपतको जुनसुकै अवस्थामा जेसीजलाई सम्पर्क गर्न समेत आग्रह गरेको छ । विरामीलाई अस्पताल सम्म पुर्याउन तथा राहत र उद्दारको कार्यमा लागिरहेको भीरकोट जेसीजका महासचिव कृष्णप्रसाद अर्यालले जानकारी दिए ।
अभियानलाई सघाउदै भीरकोट ५ का वडा अध्यक्ष अधिकारी
कोरोना विरुद्धको मैदानी लडाईमा कतिपयले पुर्याइरहेको योगदान तारिफ योग्य वन्न पुगेको छ । राज्यले महामारीलाई उचित तवरले व्यवस्थापन गर्न नसक्दा अस्तव्यस्त भएको जनजीवनलाई स्थानीय तवरमा व्यवस्थित गर्ने प्रयत्न भइरहेको छ ।
विपतको यो अवस्थामा कोरोना संक्रमणवाट विपतमा परेका विरामीहरुलाई मानवीय सेवा गरिरहेका छन् । तीमध्येका एक पात्र भीरकोट नगरपालिका अन्तर्गत वडा नं ५ का वडा अध्यक्ष यामप्रसाद अधिकारीले भीरकोट जेसीजको अभियानलाई सघाउदै आफू चढने निजि स्कारपियो पिक अप मानवीय सेवाका लागि प्रदान गरेका छन् ।
वालिङ जेसीजका पूर्व अध्यक्ष समेत रहेका अधिकारीले जेसीज आस्था र विश्वासलाई आत्मसाथ गर्दै विपतका वेला सधै अग्रपंतीमा क्रियाशिल हुँदै आइरहेका छन् । जेसीज अभियानवाट मानवताको सेवा जीवनको सर्वोत्तम कार्य हो भन्ने विश्वासमा अडिक रहेका अधिकारी भिरकोटका नागरिकको अन्य सामाजिक तथा व्यक्तिगत समस्यासंग सदैव नजिकवाट सहयोगी भूमिका निर्वाह गर्दै आइरहेका छन् ।
अघिल्लो वर्ष निजि खर्चमा राहत सामाग्रि वितरण तथा माक्स सेनीटाईजर र सावुन वितरण गरेका उनले यसपटक अझै उत्कृष्ट कार्यमा भीरकोट जेसीजलाई निजि गाडी एम्वुलेन्सको रुपमा प्रयोग गर्न दिएका छन् ।
वडा अध्यक्ष अधिकारी भन्छन, असहज अवस्थामा त झन् जनप्रतिनीधिको दायित्व बढि रहने हुदा आफू यस्तो सेवामा समर्पित भएको उनको भनाई छ ।
भीरकोटवासीको हरेक समस्यासंग सधै नजिक रहने अधिकारी एक सफल युवा व्यवसायी समेत हुन । उनले सफल फर्निचर नामको उद्योग सन्चालनमा ल्याएका छन् । उनी वालिङ उद्योग वाणिज्य संघका पूर्व सह कोषाध्यक्ष, फर्निचर तथा फर्निसिङ व्यवसायी संघ स्याङ्जाका संस्थापक अध्यक्ष पनि हुन् ।
भीरकोट नगरपालिकाले अक्सिजन सहितको २० बेड तयार गर्दै
नयाँ भेरियण्ट सहितको कोरोना संक्रमण नियन्त्रण र व्यवस्थापनमा जुटेको भीरकोट नगरपालिकाले हेलु स्थित अस्पतालमा अक्सिजन सहितको २० वटा वेड तयार गरेको छ ।
नयाँ व्यवस्थापन सहित २० वटा वेड सन्चालनको अन्तिम तयारीमा रहेको भीरकोट नगरपालिकाका प्रमुख छाँयाराम खनालले जानकारी दिएका छन् ।
भीरकोट नगरपालिकामा नगरपालिकाले गरेको परिक्षणवाट २४ जना र आफू सुकै वालिङ, पोखरा र काठमाण्डौमा उपचारको क्रममा परिक्षणवाट पत्ता लागेका १३ जना गरि ३७ जना सक्रिय संक्रमित रहेका छन् । उनीहरु मध्ये दुईजना अस्पतालमा उपचाररत छन् भने अन्य सबै होम आइसोलेशनमा स्वास्थ्य लाभ गरिरहेको भीरकोट नगरपालिकाको स्वास्थ्य शाखाका प्रमुख नारायणवन्धु अर्यालले जानकारी दिएका छन् ।
संक्रमितको संख्या वढ्दै जान थालेपछि व्यवस्थापनमा जुटेको नगरपालिकाले अस्पतालमा रहेको ६० वटा साना ठूला अक्सिजनको सिलिण्डरलाई प्रयोगमा ल्याउने अन्तिम चरणमा रहेको छ । ६० मध्ये नियमित प्रयोगमा रहेको १० वटा अक्सिजनलाई कोरोना संक्रमितलाई प्रयोग गर्न नसकिने भएपछि हाललाई २० वटा अक्सिजन सहितको वेड र दुई जना चिकित्सक सहित १० जना जनशक्ति कोरोना उपचारकालागि व्यवस्थापन गरिएको नगर प्रमुख खनालले जानकारी दिए ।
नगरपालिकाले रोग नियन्त्रण र हाल वढिरहेको संक्रमणको चेन ब्रेक गर्न नगरपालिकालाई निषेधाज्ञा घोषणा गरी संक्रमितको पहिचान र व्यवस्थापनमा लागेको नगरपालिकाले पहिलो चेन ब्रेक गर्न नगरपालिकाको स्वास्थ्य शाखाको सम्पूर्ण संयन्त्र, जनप्रतिनिधि र स्थानीय प्रशासन र सुरक्षाकर्मी परिचालन गरेको जनाएको छ भने समुदायस्तरवाट पनि विभिन्न संघ संस्था र टोलविकास संस्थाले नगरपालिकालाई सघाउ पुर्याइरहेको नगर प्रमुख खनालले जानकारी दिएका छन् ।
उनका अनुसार नगरपालिका भित्रका टोल विकास संस्थाका अध्यक्षलाई आफ्नो टोलको अवस्थाको वारेमा नियमित स्वास्थ्य शाखा र जनप्रतिनिधिलाई सम्पर्क गर्न उनीहरुलाई मासिक रु तिनसय संचार खर्च समेत व्यवस्था गरी संक्रमण नियन्त्रणका लागि छुट्टै खालको प्रयास थालनी गरिएको छ जुन निकै प्रभावकारी रहेको समेत उनले जानकारी दिए ।
आफ्ना नगरवासी उपचारवाट वञ्चित हुन नपरोस र उपचार नपाएर कुनैपनि नागरिकको ज्यान खतरामा नपरोस भनेर नगरपालिकाको सम्पूर्ण स्रोत साधन परिचालन गरिएको समेत उनले वताए ।
हालसम्म देशका विभिन्न ठाँउमा भीरकोट नगरपालिका घर भएका वाहिर उपचारमा रहँदा ज्यान गुमाउनेको संख्या २ जना रहेको समेत नगरपालिकाले जानकारी दिएको छ ।
