काठमाडौं । प्रधानमन्त्री एवं नेकपा एमालेका अध्यक्ष केपी शर्मा ओलीसँगको वार्तामा कुनै प्रगति नभएको नेकपा नेता माधवकुमार नेपालले बताएका छन् ।
डेढ महिना लामो सम्वादहीनता तोडेर बुधबार दुई नेताबीच २ घण्टा लामो कुराकानी भएको थियो । त्यसको भोलिपल्ट बिहीबार पनि दुई नेताबीच मेरियट होटलमै डेढ घण्टा कुराकानी भएको छ ।
तर, दुई दिनमा शीर्ष दुई नेताबीच वान टु वान साढे तीन घण्टा भेटवार्ता हुँदा समेत दुई नेता आ–आफ्नो अडानमा टसकोमस नभएपछि परिणाम शून्य हात लागेको छ । विभाजनको मुखमा पुगेको समयमा दुई शीर्ष नेताबीच आकस्मिक जुरेको भेट दुई दिनसम्म मन्थन गर्दा समेत कुनै उपलब्धी नभए पछि माधव नेपाल हतास मुडमा निस्किएका थिए । हिजोको भेटवार्ताबाट देशभर कार्यकर्तामा नयाँ रक्तसञ्चा पलाए पनि आजको बैठकले निराश बनाएको छ । दुई नेताबीचको छलफलमा कुनै प्रगति नभएको नेता नेपालले बताए ।
‘मिल्ने सम्भावना पनि देखिएको छैन । अब छलफल कहिले हुन्छ थाहा छैन ।’ पत्रकारसंग कुरा गर्दै नेपालले भने, ‘हिजोको भेटवार्तामा केही आशा जगाएको थियो । आज झन निराश बनायो ।’
माधव नेपाल सहित ३२ जनालाई अध्यक्ष ओलीले सोधिएको स्पष्टिकरण भोलि सकिदै छ । अध्यक्ष ओली भोलि बस्ने केन्द्रीय कमिटी बैठकबाट नेपाल समूहका ३२ जनालाई कारवाही गर्ने मुडमा रहेका छन् ।