काठमाडौं । रेशम चौधरी र लक्ष्मण चौधरी लगायतको मुद्दा खारेजका लागि थारु कल्याणकारीणी सभा, थारुहट–थारुवान संयुक्त संघर्ष समितिले आयोजना गरेको विरोध सभामा सरकारको तर्फबाट गृहमन्त्री रामबहादुर थापा सहभागी भएका छन् ।
माइतीघर मण्डलामा आयोजित विरोध कार्यक्रममा सहभागी थापाले आन्दोलनकारीको १९ बुँदे समस्या र माग बारेमा सरकारको ध्यान गएको बताएका थिए ।
सडकमा बसेर सम्बोधन गरेका थापाले सरकारको तर्फबाट आफु यहाँ आएको र संघर्ष समितिका समस्या समाधान गर्न छिट्टै वार्ता टोली गठन गर्ने प्रतिवद्धता जनाएका थिए । वार्ताको लागि आन्दोलनकारीबाट समेत वार्ता टोली गठन गर्न आग्रह गरेका थिए ।
जनता समाजवादी पार्टी नेपालले रेशम चौधरीको रिहाइको एजेण्डासहित सरकारसँग वार्ता गरिरहेकै समयमा अन्य पार्टीमा संघ संगठनले समेत चौधरीको रिहाइको मागसहित आन्दोलन गरिरहेका छन् ।
