काठमाडौं । नेपाल कम्युनिष्ट पार्टी (नेकपा)को दाहाल¬नेपाल समुहका अध्यक्ष पुष्पकमल दाहालले प्रधानमन्त्री केपी शर्मा ओलीसँग भएको एकतामा गरिएको सहमति कार्यान्वयनमा आफूले देखाएको उदारता नै कमजोरी रहेको बताएका छन् । यहाँ आज भएको अनेरास्ववियूको उपत्यकास्तरीय भेलालाई सम्बोधन गर्दै अध्यक्ष दाहालले पार्टीको एक नेताले अल्पमतमा परेपछि सजिलै छाडिदिएको भए पार्टी फुट्न अवस्था नै आउने थिएन भने ।
मुलुकमा प्रतिनिधिसभा विघटन गरी संविधानमाथि प्रहार भएको जिकिर गर्दै पूर्वप्रधानमन्त्री दाहालले अब हुन सक्ने षड्यन्त्रविरुद्ध आन्दोलनमा लाग्न युवा तथा विद्यार्थीलाई आह्वान गरे ।
यस्तो षड्यन्त्र र प्रतिगामीहरुको मुटु हल्लिने गरी आवेगमय आन्दोलन चाहिएको पनि दाहालले बताए । ओलीले शाकाहारी आन्दोलनलाई नगन्ने भन्दै उनले भने, ‘हाम्रो आन्दोलन अलि आवेगमय हुनु पर्यो । अलि जुझारु, आक्रामक हुनु पर्यो । शाकाहारी जस्तो हुनु भएन । बाघ, सिंह गज्रे जस्तो हुन पर्ने भयो ती प्रतिक्रान्तिकारीहरुको मुटु हल्लिन पर्यो । त्यस्तो आन्दोलन चाहिएको छ ।’
प्रतिगमनलाई कुनै हालतमा सफल हुन नदिने भन्दै दाहालले कार्यकर्ताको रक्षाका लागि आन्दोलनको अग्रपंक्तिमा आफू हुने बताए । उनले कार्यकर्तालाई जोगाउन आफ्नो टाउको फुटाउन पनि तयार भएको दाबी गरे । ‘माघ ९ गतेको प्रदर्शनमा हामी अग्रपंक्तिमा हुन्छौं । हिजो गिरिजाबाबु, माधव, झलनाथजीहरुले लाठी खाएजस्तै मलाई किन किन मेरो टाउको चिलाएको हो कि के हो ? तपाईंहरु पछाडि, म अगाडि बस्छु र लाठी खान मन लागेको छ । म त्यो स्परिडमा छु,’ दाहालले भने, म तपाईंहरुको टाउको जोगाउन मेरो टाउको फुटाउन तयार छु । तर, यो प्रतिगमनलाई कुनै हालतमा सफल हुन दिइने छैन । हजारौं सहिद र योद्धाहरुको सपना खेर जाने छैन । नेपाललाई प्रतिगमनतिर लैजाने सोचेको छ भने त्यो भ्रम हो ।’
ओली र उनका मान्छेले सर्वोच्च अदालत, निर्वाचन आयोगलाई समेत धम्काउँदै हिँडेको दाहालले बताए । ‘केपी र उनी नजिकका मान्छेहरुले सेटिङ भइसक्यो, सूर्य पनि भनेको हाम्रै हुन्छ भनेको देख्दा, अदालतले पनि हामीले भनेअनुसार नै गर्छ भनेको देख्दा यो सेटिङ शब्दभित्र के रहस्य हो भन्ने चिन्ता लागेको छ,’ दाहालले भने, ‘म यो मञ्चबाट सर्वोच्च अदालत र निर्वाचन आयोगलाई शंका गर्न चाहन्न । तर केपीको सेटिङलाई त शंका गर्न पाइयो नि हामीले ?’
उनले प्रतिनिधिसभा र पार्टीको आधिकारिकताका विषयमा अदालत र निर्वाचन आयोगप्रति आफ्नो विश्वास रहेको र सबैभन्दा बढी भरोसा जनतामा रहेको जनाए ।
उक्त कार्यक्रममा पूर्वप्रधानमन्त्री एवं नेकपाका वरिष्ठ नेता झलनाथ खनालले सर्वोच्च अदालत र निर्वाचन आयोगले तजबिजीभन्दा पनि कानून र संविधानका आधारमा निर्णय लिने विश्वास व्यक्त गरे।
नेकपा स्थायी कमिटी सदस्य भीमबहादुर रावलले र सुरेन्द्रप्रसाद पाण्डेले प्रतिगमनविरुद्धको हरेक मोर्चामा युवा विद्यार्थी अग्रपङ्तिमा रहेको इतिहास स्मरण गर्दै यसपालि पनि फेरि विद्यार्थी जाग्ने बेला आएको बताए। अर्का नेता हितमान शाक्यले प्रतिनिधिसभा विघटन संविधानविरुद्ध सशक्त प्रतिकार गर्न आग्रह गरे।
