काठमाडौं । संसद विघटनको विरोधमा आन्दोलनरत प्रचण्ड–माधव नेपाल समूह अनेरास्ववियूले आज बयलगाढासहित प्रदर्शन गरेको छ । आइतबार काठमाडौंको माइतीघरमा विद्यार्थीहरुले ओलीलाई गणतन्त्र विरोधीको संज्ञा दिँदै उनको विरोधमा बयलगाडा प्रदर्शन गरेका हुन् ।
जनआन्दोलनका बेला ओलीले ‘गणतन्त्र आउनु र बयलगाडा चढेर अमेरिका पुग्नु उस्तै हो’ भनेका थिए । सोही अभिव्यक्तिको व्याङ्ग्य गर्न अनेरास्ववियूले आइतबार राजधानीसहित देशका विभिन्न स्थानमा बयलगाडा प्रदर्शन गरेको हो ।
थापाथली क्याम्पस परिसरबाट बयलगाढासहित विद्यार्थीहरु सडकमा आउनासाथ प्रहरीले उनीहरुलाई तितरबितर पारेको थियो ।
संसद विघटनको विरोध गर्दै प्रचण्ड–माधव समूह निकट अनेरास्ववियू हाल दोस्रो चरणको आन्दोलनमा छ ।
