काठमाडौँ- प्रधानमन्त्री केपी शर्मा ओलीले संसद विघटनको प्रस्ताव राष्ट्रपतिसमक्ष सिफारिस गरेसँगै नेकपाका कार्यकारी अध्यक्ष पुष्पकमल दाहालसहितका शीर्ष नेताहरू खुमलटारमा ‘आकस्मिक’ छलफलमा जुटेका छन् ।
वरिष्ठ नेताद्वय झलनाथ खनाल र माधव कुमार नेपाल तथा प्रवक्ता नारायणकाजी श्रेष्ठ सहभागी बैठकले संसद विघटनको प्रस्ताव सिफारिस गर्ने ओलीको कदमविरूद्ध सामूहिक धारणा तय गर्नेछ ।
यसअतिरिक्त बालुवाटारमा पूर्वनिर्धारित स्थायी कमिटी बैठकको आवश्यक तयारी पनि भइरहेको दाहालका प्रेस संयोजक विष्णु सापकोटा ‘जुगल’ ले जनाएका छन् ।
बैठकमा उपाध्यक्ष बामदेव गौतम र सचिवालय सदस्य रामबहादुर थापा’बादल’ भने सरिक छैनन् । यद्यपि उनीहरू आउने अपेक्षा गरिएको सापकोटाले बताए ।
संसद विघटन गर्ने प्रधानमन्त्री केपी शर्मा ओलीको निर्णय असंवैधानिक, अमर्यादित र अराजक भएको नेपालले बताएका छन् ।
पार्टी विवाद चरमोत्कर्षमा पुगेका बेला प्रधानमन्त्री ओलीले मन्त्रिपरिषदको आकस्मिक बैठकमार्फत संसद विघटको सिफारिस गरेकोमा कडा आपत्ति जनाउँदै नेता नेपालले ओलीको उक्त कदम ‘अराजक’ भएको बताइसकेका छन् ।
