वालिङ, १७ माघ ।
वालिङमा जारी रमाइलो मेलाको आकर्षणको रुपमा रहेको विच भलिबल प्रतियोगिताको उपाधि ग्रिन हिल रिसोर्ट रामबाच्छाले जित्न सफल भएको छ ।
वण्डरफूल वालिङ पर्यटन विकास संस्थाद्वारा आयोजित ‘प्रथम वालिङ सांस्कृतिक तथा आन्तरिक पर्यटन रमाईलो मेला २०७६’ मा जिल्लामै पहिलो पटक आयोजना गरिएको पुरुष बिच भलिबल प्रतियोगितामा ग्रिन हिल रिर्सोट विच भलिबलको च्याम्पियन बन्न सफल भएको हो ।
शुक्रबार भएको फाईनल खेलमा पतुलीबजार नगरपालिका ७ को समुहलाई पछाडि पार्दै ग्रिन हिलले उपाधि जितेको हो । त्यस्तै तृतिय स्थान गह्रौसुर धार्मिक पर्यटकीय केन्द्रले हात पार्दा विधान स्पोर्ट हाउस वालिङ ८ सान्त्वनामा समेटिएको छ । विजेता तथा उपविजेतालाई पुरस्कार वितरण गर्दै वालिङ नगरपालिका प्रमुख दिलिपप्रताप खांणले खेल क्षेत्रको विकास आवश्यक रहने भन्दै खेलकै माध्यमबाट नेपाल र नेपालीको शान अन्तराष्ट्रिय जगतमा जिवित रहेको बताए ।
साथै प्रमुख खांणले खेल क्षेत्रमा लागेका खेलाडिहरुलाई व्यवासायिक बनाउन आवश्यक रहेको भन्दै खेल जगतको विकासका लागी नगरपालिका प्रतिवद्ध रहेको बताए । आन्तरिक पर्यटन प्रर्वद्धनका लागी आयोजित रमाईलो मेलाले वास्तवमै यहाँका संस्कृति र पर्यटनको प्रवर्दनमा सहयोग गरेको उल्लेख गरेका थिए ।
प्रतियोगितामा प्रथम, द्वितीय, तृतीय र सान्त्वना हुने समूहले क्रमश रु ३०, २०, १२ र ८ हजार नगदसहित शिल्ड, मेडल र प्रमाण पत्र प्राप्त गरेको खेल संयोजक दिपेन्द्र खाँणले वताए । वण्डरफूल वालिङ पर्यटन विकास संस्थाका अध्यक्ष दिनकर नेपालको सभापतित्वमा सम्पन्न कार्यक्रमको सञ्चालन निर्भिकनारायण भुर्तेलले गरेका थिए ।
त्यस्तै खेलमा उत्कृष्ट खेलाडीको रुपमा रामबाच्छाकै रवि सेन्चुरी घोषित हुँदा २ हजार नगदसहित प्रमाण पत्रद्वारा सम्मान गरिएको थियो ।
