भैरहवा ३, भदौ ।
नेपाली कांग्रेसका सभापति शेरबहादुर देउवाले वर्तमान दुई तिहाईको बाम सरकार प्रजातन्त्रको विरुद्ध लागेको आरोप लगाएका छन् ।
वर्तमान सरकार अधिनायकबाद तर्फ लागिरहेको उल्लेख गर्दै सभापति देउवाले प्रजातन्त्रको बिरुद्ध लाग्ने कसैलाई पनि कांग्रेसले नछोड्ने चेतावनी दिए ।
पूर्व प्रधानमन्त्री समेत रहेका पार्टि सभापति देउवाले प्रजातन्त्रको खिलाप र यसलाई सिध्याउन लाग्ने कुनै शक्तिलाई कांग्रेसले नछाड्ने चेतावनी दिदै प्रजातन्त्रको खिलापमा नलाग्न सबैलाई आग्रह गरे ।
नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा रुपन्देहीको भैरहवामा सुरु भएको प्रदेश पाँच स्तरीय दुई दिने महाधिवेशन प्रतिनिधिहरुको प्रशिक्षण कार्यक्रमलाई सोमबार सम्बोधन गर्दै देउवाले राणा शासन, पञ्चायत र राजतन्त्र विरुद्ध कांग्रेसले संघर्ष गरेको स्मरण गराउदै ओली सरकार प्रजातन्त्र विरुद्ध अगाडि बढे नछाड्ने चेतावनी दिए । उनले वर्तमान सरकारले अभिव्यक्ति स्वतन्त्रताको हनन् गर्नुका साथै मिडियालाई पनि नियन्त्रण गर्न खोजेको आरोप लगाए ।
“मानवअधिकार आयोग स्वतन्त्र हुनुपर्छ, तर सरकारले आयोगको अधिकार खोस्न खोजेको छ, सरकार प्रजातन्त्र सिध्याउने दिशातर्फ अगाडी बढ्न खोजेको छ, मिडिया विधेयक काउन्सील प्रजातन्त्र विरुद्धको हस्तक्षेप हो, उनले भने ।” यी कुरामा सरकार नसच्चीए काग्रेस सदन र सडकबाट आन्दोलन समेत गर्न पछाडि हट्ने छैन ।
देउवाले पार्टीमा अन्तरघात गर्नेलाई कारवाही गरिने बताए । उनले पार्टी भित्र अन्तरघात गर्नेलाई कारवाही नगदा सम्म पार्टिले कहिल्यै नजित्ने बताउदै पार्टि भित्रको अनुसासन समितिलाई थप बलियो बनाउने बताए ।
“पार्टीलाई मर्यादित र अनुशासित ढंगबाट सञ्चालन गर्न निर्वाचनमा अन्तरघात गर्ने जोसुकैलाई पनि पार्टीले कारवाही गर्छ, देउवाले भने ।” भाषण गरेर चुनाव जित्न नसकिने भएकोले काम गरेर देखाउन नेता कार्यकर्तालाई उनले आग्रह गरे । पार्टी एकता आवश्यकता रहेकोमा जोड दिदैं देउवाले चुनाव जित्न पार्टी एकता बिना सम्भव नभएको बताए ।
पार्टीका वरिष्ठ नेता रामचन्द्र पौडेलले जनताले दुईतिहाई बहुमत दिएर पठाएको बाम सरकारले दुईतिहाईलाई दुरुपयोग गरेको आरोप लगाए । उनले सरकारले संविधानको मर्म माथि नै प्रहार गरेको बताए । “सरकारको ढुकुटी कार्यकर्तालाई बांडिएको छ, उनले भने ।”
नेता पौडेलले लोकतन्त्रको रक्षा गर्ने चुनौती खडा भएको बताए । उनले कांग्रेसको सिद्धान्त सधै विजयी भएको दावी गरे । पौडेलले दुईतिहाई बहुमतको सरकारले केही काम गर्न नसकेको आरोप समेत लगाए ।
पार्टीका उपभापति तथा नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानका संयोजक विमलेन्द्र निधिले सरकारले लोकतन्त्र विरुद्धमा काम गरिरहेको आरोप लगाए । उनले लोकतन्त्र रक्षा गर्दै पार्टिले नीति तथा सिद्धान्तलाई आम कार्यकर्ता र मतदाता माझ लैजान जरुरी रहेको बताए ।
कांग्रेसका उपसभापति तथा संसदीय दलका उपनेता विजय कुमार गच्छदारले नेपाली कांग्रेस संगठित हुन आवश्यक रहेकोमा जोड दिए । उनले कांग्रेसका नेता कार्यकर्ता लोकतन्त्र तथा स्वतन्त्रताको लागि लड्दै आएको बताए । आउदो उपनिर्वाचनमा नेपाली काग्रेसका उम्मेदवारलाई बिजयी बनाउनका लागि आजैबाट प्रचारप्रसारमा जुट्नु पर्ने बताए ।
पार्टीका पूर्व महामन्त्री तथा केन्द्रीय सदस्य कृष्ण प्रसाद सिटौलाले अब कार्यकर्तामाझ मात्र नरहेर कांग्रेस जनतामाझ पनि जानुपर्ने बताए । उनले जनमतकै आधारमा कांग्रेसले सरकारलाई सही दिशातर्फ लैजान सक्ने बताए ।
नेपाली कांग्रेस संसदीय दलका प्रमुख सचेतक बालकृष्ण खांणले लोकतन्त्र रक्षाको लागि पार्टीले शान्तिपूर्ण संघर्ष गर्नुपर्ने बताए । उनले जनताको मौलिक हकको सम्बद्र्धन कांग्रेसले गर्नुपर्ने बताए । कांग्रेसका संसदीय दलका सचेतक पुष्पा भुसालले पार्टी एकढिक्का भएर अगाडी बढ्नुपर्ने बताइन् । प्रशिक्षण कार्यक्रम दुई दिनसम्म चल्ने छ । प्रशिक्षणमा प्रदेश ५ का १२ जिल्लाका ४ सय बढी प्रतिनीधिले प्रशिक्षण लिदै छन् ।
