हिमदुत सम्वाददाता
काठमाण्डौ २६, साउन ।
सत्तारुढ दल नेपाल कम्यूनिष्ट पार्टी नेकपाका सांसद खगराज अधिकारीले कालिगण्डकीको पानी डाइभर्सनगरी तिनाउँमा लैजादा तटिय क्षेत्रमा हुने नकारात्मक प्रभावको वारेमा संसदमा प्रश्न गर्दै यस विषयमा गम्भीर हुन सरकारलाई आग्रह समेत गरेका छन् ।
प्रतिनिधि सभाको सून्य समयमा वोल्दै अधिकारीले कालिगण्डकी नदीका कारण प्रसिद्ध केलादीघाट र देवघाटको अस्थित्व समाप्त हुने र चापाकोट र रामपुर जस्ता टारहरु सिंचाइ हुनवाट वञ्चित हुने छ । डाइभर्सनको विषय उठनासाथ यस विषयमा बहस सुरु भएको वताएका छन् ।
राम्दीबाट कालीगण्डकीलाई थुनेर तिनाउ नदीमा पानी खसाल्ने प्रयास अगाडि बढ्न थालेपछि यसको विरुद्धमा आवाज उठ्न थालेको छ । कालीगण्डकीको पानीलाई सिँचाइका नाममा अन्यत्र लैजाने योजना अगाडि बढ्न थालेपछि यसका विरुद्धमा तल्लो तटीय क्षेत्र प्रदेश नम्बर ५ र गण्डकी प्रदेशका सम्बन्धित क्षेत्रका नागरिक तथा जनप्रतिनिधिले विरोध जनाउँदै आएका छन् ।
तल्लो तटीय क्षेत्रअन्तर्गतका पाल्पा, स्याङ्जा, तनहुँ र नवलपुरका स्थानीय तहले नदीको पानीलाई थुनेर अन्यत्र लैजाने प्रयासलाई रोक्न त्यस क्षेत्रका स्थानीय तहले एकताबद्ध भएर अगाडि बढ्ने अभियानमा जुट्न थालेका छन् । पाल्पा र स्याङ्जाको सिमानास्थित राम्दीमा ड्राइभर्सन गरेर कालीगण्डकीको पानी तिनाउ नदीमा पोखिने योजनाप्रति कालीगण्डकी तटिय क्षेत्रका स्थानीयवासी सन्तुष्ट छैनन् ।
रुपन्देही, कपिलवस्तु र नवलपरासीको विभिन्न भू–भाग सिँचाइ गर्ने योजनाअनुरुप नदीलाई राम्दीबाट ड्राइभर्सन गरेर तिनाऊ खोलामा लैजाने योजना सरकारको रहेको छ ।
