फाइल तस्वीर
हिमदुत सम्वाददाता
स्याङ्जा–२५, साउन ।
तिजको चहलपहल सुरु भएलगत्तै राजमार्ग र ग्रामिण सडकमा यात्रुहरुको आउजाउ वढने गर्दछ । यो समयमा यात्रुहरुलाई ठग्ने, लुट्ने जस्ता घटनाहरु पनि मोलाउदै जाने गरेको पाईन्छ । राजमार्गमा सवारी चालकको लापर्वाही र क्षमता भन्दा वढी यात्रु राखेर यात्रा गर्दा सवारी दुर्घटना वढ्ने गरेको पाइएको छ । भने ग्रामिण सडकमा पुराना नियम विपरितका जीपहरु वढी दुर्घटनामा परेको तथ्याङ्कले देखाएको छ ।
स्याङ्जामा पनि यस्ता समस्याहरु वारम्वार आइरहेका छन् । वर्षा सकिनासाथ चाडपर्वको चहलपहल विस्तारै वढ्दै जान्छ । ग्रामिण सडकमा यात्रुहरुको ओहरदोहर पनि विस्तारै वढ्दै जान्छ । जिल्लाका सबैजसो ग्रामिण सडकमा यातायातको साधनको रुपमा महिन्द्रा जीपको प्रयोग भएको पाइन्छ । जीप अधिकांश पाँच सिट क्षमताका सन्चालनमा आएका छन् । पाँच सिट क्षमताका जीपमा ३० जनासम्म यात्रु वोकेर यात्रा गरिरहेको देखिन्छ । जिल्लाका अधिकांश सडकमा ठूला सवारी साधन बस चल्न सक्ने अवस्थामा सडकको स्तरउन्नती भएका छन । तर, तिनै सडकमा यात्रु जोखिमपूर्ण यात्रा गर्न विवस छन् ।
यस्ता सडकमा व्यवसायीले सिट क्षमता भन्दा वढी यात्रुलाई भेडाबाख्रा जस्तै कोचाकोच राखेर यात्रा गराउने र छतमा समेत राखेर यात्रा गराउँदा प्रहरी प्रशासन समेत गम्भिर नभएको नागरिकहरुले आरोप लगाएका छन् । हाल स्याङ्जाका सबैजसो ग्रामिण सडकमा मापदण्ड विपरितका झण्डै तिन सयको हाराहारीमा जीप सन्चालनमा छन् । सडक विभागले जारी गरेको रुट परमिट विना यातायात सन्चालन गर्न नपाउने कानुनको धज्जी उडाउदै व्यवसायीहरुले जीप सन्चालन गरिरहेका छन् ।
फाइल तस्वीर
फाइल तस्वीर
सडक यात्रा सुरक्षित बनाउन भन्दै नियम, कानून र निर्देशिकामा परिमार्जन गरिएपनि त्यसको कार्यान्वयन पक्ष फितलो देखिएको टिप्पणी भएका छन् । कानूनी प्रावधान अनुसार कडाइ नहँुदा घातक सडक दुर्घटना रोकिन नसकेका भन्दै सडक सुरक्षासम्बन्धी जानकारहरुले चिन्ता व्यक्त गरेका छन् । स्याङ्जामा पनि वेला वेला व्यवसायी र सरोकारवाला निकायसंग विभिन्न खालका सहमतिहरु हुने गरेका छन् । झण्डै पाँच वर्ष अगाडी स्याङ्जाका प्रमुख जिल्ला अधिकारीको रहोवरमा व्यवसायीहरुलाई मापदण्ड विपरितका सवारी साधन विस्थापित गर्ने सहमती भएको थियो । उक्त सहमती वर्षौ वितिसक्दा पनि कार्यन्वयनमा आउन सकेको छैन ।
संघिय संरचना अनुरुप बनेका स्थानीय तह अधिकार सम्पन्न छन् । विकासको लहर ल्याउछौ भनेर अगाडी वढिरहेका स्थानीय तहका प्रमुखले सडकको अवस्थाको वारेमा कहि कतै सोचविचार गरेको देखिदैन । स्मार्ट सिटी उन्मूख नगरपालिकाको छेउमा पाँच सिट पास भएका जीपहरुले ३० जना सम्म यात्रुवोकेर यात्रा गरिरहेको तिनै जनप्रतिनिधिले टुलुटुलु हेरेर बसिरहेका छन् । सेवाका नाममा भएको यो अनियमितता कहिले सम्म जारी रहन्छ, हामी प्रश्न गर्न चाहन्छौ ।
अब जिल्लाका सरोकारवाला प्रहरी प्रशासन, स्थानीयतह, नागरिक समाज, व्यवसायी मिलेर उचित निकास निकाल्न जरुरी छ । ठूला सवारी साधन चल्न सक्ने ठाँउमा ठूला सवारी साधन चलाउने, हलुका तथा साना सवारी साधन सिट क्षमताका सन्चालन गर्न पहल गर्नुपर्ने देखिन्छ । यसतर्फ जिल्ला ट्राफिक कार्यालयका प्रमुखसंग कुराकानी गर्दा व्यवसायी सहित सरोकारवाला संग समन्वय गरेर सडकको अनियमितता पूर्णरुपमा हल गर्ने प्रतिवद्धता व्यक्त गरेका छन् । तर कार्यन्वयको पाटो भने हेर्न वाँकी छ ।
