हिमदुत सम्वाददाता
स्याङ्जा २४, साउन ।
विप्लव समुहका दुई जना कार्यकर्तालाई प्रतिवन्धित विप्लव समुहको दस्तावेज, हतियार र विष्फोटक पदार्थ सहित जिल्ला प्रहरी कार्यालय स्याङ्जाले पक्राउ गरेको छ ।
भीरकोट नगरपालिका ९ का ४६ वर्षीय शिव दर्लामी र सोही ठाँउका हाल वालिङ ९ बस्ने मोहन सिंजाली पक्राउ परेको जिल्ला प्रहरी कार्यालय स्याङ्जाका सूचना अधिकारी तथा प्रहरी निरिक्षक विजयकुमार सिंहले जानकारी दिए ।
शिवलाई गल्याङ ३ मा शंकास्पद गतिबिधि गरेको अवस्थामा प्रहरीले नियन्त्रणमा लिई खानतलासी गर्दा शिवको साथबाट प्रतिबन्धित नेपाल कम्युनिष्ट पार्टी विप्लब समुहको विभिन्न दस्तावेज तथा नेपाल कम्युनिष्ट पार्टी केन्द्रिय समितिको लेटर प्याडमा विभिन्न व्यक्तिहरुको नाममा उल्लेखित गरी ५० लाख चन्दा माग गरेको १८ थान लेटर प्याड समेत फेला परेको र सोधपुश गर्दा मोहन सिंजाली समेत संलग्न रहेकोले मोहनलाई समेत पक्राउ गरीएको प्रहरीले जनाएको छ ।
त्यस्तै शिव दर्लामीको २ तले गोठ तथा धन्सारबाट एयरगन १ थान, बम जस्तो देखिने आईइडि ५ थान, चन्दा उठाउने रसिद प्याड १ थान, सदस्यता रसिद ३ ठेलीसहित विप्लव समुहको दस्तावेजहरु बरामद गरिएको प्रहरी निरिक्षक सिंहले बताए । उनीहरुले विभिन्न व्यक्तिहरुलाई धाक, धम्की दिई चन्दा उठाउने गरेको प्रहरीले जनाएको छ ।
