कला राना,वालिङ १६ साउन ।
वालिङ उद्योग बाणिज्य संघले टोल भेला कार्यक्रम मार्फत सरकारले यही साउनबाट लागू गरेको नयाँ करनितिका बारेमा जानकारी दिने अभियान विहिबारदेखि शुरु गरेको छ । संघले टोल भेला गरी व्यापारी तथा व्यवसायीलाई कर शिक्षा प्रदान गर्नुका साथै संघका गतिविधि समेत सार्वजानिक गरेको छ । विहिबार पहिलो टोल भेला वालिङ १ रामबाच्छामा सम्पन्न भएको छ । कार्यक्रममा नगरपालिका प्रमुख प्रशासकिय अधिकृत गुरुदत्त सुवेदीले देशमा समृद्धिका लागी अण्डर विलिङको अन्त्य हुनुपर्ने भन्दै सुरुवात आँफैबाट शुरु गर्नुपर्ने बताउनुभयो । वालिङ उद्योग वाणिज्य संघले प्रंशसनीय कार्य गरेको भन्दै स्थानीय सरकार र निजि क्षेत्र संगसंगै अगाडि बढ्नुपर्ने बताउनुभयो । कार्यक्रममा वडा नं. १ का अध्यक्ष एवं प्रवक्ता केदार काफ्लेले व्यवसायलाई पारदर्शी बनाउने नयाँ निति नियमले सघाउ पुग्ने भन्दै कार्यक्रम प्रभावकारी रहेको बताउनुभयो । कार्यक्रमका बारेमा प्रकाश पार्दै संघका पुर्व अध्यक्ष पुण्यप्रसाद अर्यालले बैंक र करलाई व्यवस्थित गर्न सके व्यवसायको हित हुने बताउनुभयो । भेलामा फेवा विजनेसका ट्याक्स काउन्सीलर एवं म्यानेजिङ डिरेक्टर सुरज सुवेदीले देशभत्रि मालबाहक ढुवानी गर्दा गर्नुपर्ने अनलाईन प्रणाली भिसिटिएस, साउनबाट लागू भएको नयाँ कर नितिका बारेमा सहजीकरण गर्नुभएको थियो । संघका अध्यक्ष शोभाकान्त पौडेलको अध्यक्षतामा सम्पन्न कार्यक्रममा स्वागत वरिष्ठ उपाध्यक्ष अर्जुनप्रसाद खनाल र सञ्चालन महासचिव धु्रव खांणले गर्नुभएको थियो । सहभागिहरुले साना व्यापारीका लागी विल लिनेदिने प्रक्रिया प्रभावकारी नहुँने, नयाँ करनिति स्पष्ट नबुझिएको, बजारमा अनुगमन निकाय मौन बसेको गुनसो समेत व्यक्त गरे । सरकारले रक्सी, चुरोड, होटल छुट्टाछुट्टै रुपमा सञ्चालन गर्नुपर्ने भनेपनि आवश्यक अनुगमन नहुँदा यी सबै एउटै पसलमा किनबेच भईरहेकोमा गुनासो व्यक्त गरे । त्यस्तै विहिबार वालिङ ६ मिर्दिमा समेत टोल भेला गरिँदैछ ।
