काठमाडौं, ३ मंसिर । नेपाली काँग्रेसका प्रवक्ता विश्वप्रकाश शर्माले कम्युनिष्ट नेतृत्वको वर्तमान सरकार पूर्णत असफल भएको आरोप लगाएका छन् । प्रवक्ता शर्माले उपनिर्वाचनमा आफ्नो पार्टीलाई मतदान गर्न सबै मतदातालाई आह्वान समेत गरेका छन् ।
प्रवक्ता शर्माले मंगलबार पत्रकार सम्मेलन गरी सरकारका जनविरोधी गतिविधिलाई सच्याउन पनि आम मतदातालाई आगामी मंसीर १४ गते हुने उपनिर्वाचनमा आफ्नो पार्टीमा मत गर्न आह्वान गरेका छन् ।
सरकारका भईरहेका गतिविधिलाई सच्याउने सन्देश दिने गरी आम मतदाताले मतदान गर्नुपर्दछ भन्ने हाम्रो विश्लेषण छ,’ प्रवक्ता शर्माले भने,‘२१ महिनाको अवधिमा सरकारले आफ्नो चाहना अनुसार गतिविधि गरेरनगरेको सोच्न म आम मतदातालाई आग्रह गर्दछु ।’
प्रवक्ता शर्माले कम्युनिष्ट नेतृत्वको वर्तमान सरकार पूर्णत असफल भएकाले पनि आम जनताले उपनिर्वाचनमा आफ्नो पार्टीको पक्षमा मतदान गर्नुपर्ने तर्क पनि अगाडी सारे । काँग्रेसले २१ महिनाको अवधिमा आफ्नो पार्टीले भने जिम्मेवार र शालिन प्रतिपक्षको भूमिका निर्वाह गरेको दावी पनि गरेका छन् ।
भारतसँग सीमा समस्या समाधान गर्न पनि सरकारले ठोस कदम चाल्न नसकेको काँग्रेसको आरोप छ । प्रवक्ता शर्माले उच्चस्तरीय राजनीतिक तथा कूटनीतिक पहलकदमी लिएर भारतसँगको सीमा समस्या समाधान गर्न सरकार सफल हुने नदेखिएको दावी गरे ।
प्रधानमन्त्री ओलीका पछिल्ला आवेगपूर्ण अभिव्यक्तिले सो समस्या समाधान गर्न सरकार गम्भिर नभएको देखिएको पनि उनको भनाई छ । प्रवक्ता शर्माले आन्तरिक द्धन्द्धका कारण कालापानीमा राखिएको भारतीय सेना आफ्नो पार्टी नेतृत्वको सरकारले विगतमा हटाउन नसकेको बताएका थिए ।
