काठमाडौँ । जनता समाजवादी पार्टीका सांसद रामबाबु यादवले राजेन्द्र महतोलाई कारबाही गरिने बताएका छन् । शनिबार पार्टी केन्द्रीय कार्यालयमा सञ्चारकर्मीसँग कुरा गर्दै महन्थ ठाकुर-राजेन्द्र महतो पक्षले पार्टीको विधान विपरित पार्टी संसदीय दलको नेता घोषणा गरेको भन्दै कारबाही गरिने बताएका हुन् ।
‘पार्टीको संसदीय दलको विधान नबनेको र विधान बनेपछि कार्यकारिणी समितिबाट अनुमोदन हुनुपर्ने भएपनि राजेन्द्र महतोलाई संसदीय दलको नेता विधान विपरित बनाइएयो । अहिले हाम्रो संसदीय दलको न विधान बनेको छ, र त्यो विधान बनेपछि पार्टीको कार्यकारिणी समितिबाट अनुमोदित हुनुपर्छ, संसदीय दलबाट पास भएर कार्यकारिणी समितिले अनुमोदन नगरेसम्म संसदीय दलको नेता बन्ने हुँदैन’ उनले भने ।
यादव समूहले अहिले पार्टी कार्यालय बालकुमारीमा छलफल गरेपछि ठाकुरले पार्टीको कार्यकारिणी बैठक नबोलाएको प्रेस विज्ञप्तिमार्फत जानकारी गराएका थिए । ठाकुरद्वारा जारी विज्ञप्तिमा भनिएको छ ‘जनता समाजवादी पार्टी नेपालको केन्द्रीय कार्यकारिणी समितिको कुनै पनि बैठक नडाकिएको र त्यस्तो जानकारीसमेत हामीलाई नभएको व्यहोरा सम्बन्धित सबैलाई स्पष्ट गरिन्छ ।’
जसपाभित्र ठाकुर समूहले प्रधानमन्त्री केपी शर्मा ओलीलाई समर्थन गरेको छ भने यादव समूहले नेपाली कांग्रेस र माओवादीलाई समर्थन गरेको छ ।
