काठमाडौं । सत्ता समिकरणको खेलमा जनता समाजवादी पार्टी दुई ध्रुर्वमा विभाजित भएको छ । संसद विघटन गर्ने प्रधानमन्त्री ओलीको पुस ५ गतेको निर्णयलाई असंवैधानिक कदम भएको घोषणा गरेको जसपा संसद विघटनपछि विभाजनको डिलमा पुगेको छ ।
सत्ता समिकरणमा कसलाई सहयोग गर्ने भन्नेमा संस्थागत निर्णय लिन नसकेको जसपाको आन्तरिक कलह सोमबार संसदमा प्रस्टै देखियो । निलम्बित दुई सहित ३४ सांसद रहेको जसपामा संसद पुर्नस्थापना पछि अध्यक्ष महन्थ ठाकुर र राजेन्द्र महतो समूह प्रधानमन्त्री केपी ओलीको पक्षमा उभिएका छन् ।
अर्का अध्यक्ष उपेन्द्र यादव र बाबुराम भट्टराई समूह ओलीको विपक्षमा देखिएका छन् । हिजो संसदमा विश्वासको मत लिने बेला ठाकुर र उनी पक्षका सांसद तटस्थ बसेका थिए । महन्त ठाकुरले क्रममा लागेकाहरुको मुद्दा फिर्ता लिने विषयमा सबैले सुने पनि कार्यान्वयन ओलीले गरेको भन्दै प्रधानमन्त्रीको प्रशंसा गरेका थिए ।
उनलको बुझाइमा पछिल्लो समयमा मुद्दा फिर्ता, बन्दी रिहाइ, नागरिकता, संविधान संशोधन लगायतका सवालहरुमा प्रधानमन्त्री ओलीसँग वार्ता सकारात्मक रुपले अगाडि बढिरहेको निष्कर्ष सुनाउँदै सरकारको विकल्प नखोजिने घोषणा गरेका छन् । पार्टीभित्रकै अर्का अध्यक्ष उपेन्द्र यादवले बहुमतको सरकार बनाउन विपक्षी गठबन्धन कांग्रेस–माओवादीको प्रस्तावमाथि हस्तक्षर गरेपछि सरकारको विकल्प खोज्न नहुने भन्दै सोमबार राति विज्ञेप्ती जारी गरेका छन् ।
उनले जारी विज्ञेप्तीमा भनेका छन्, ‘सरकारको विकल्प खोज्ने विषय पार्टीको कुनै नीति नरहेको प्रष्ट पार्दछु । जसपा नेपाल सत्ता प्राप्तिभन्दा एजेण्डा सम्बोधन नै जसपा नेपालको मूल ध्येय रहेको अवस्थामा मुद्दाबाट विचलित भई सरकार निर्माण गर्ने, सरकारमा सहभागी हुने वा कुनै पनि किसिमको वैकल्पिक सरकार गठनमा संलग्न हुने कार्य जसपा नेपालको उद्देश्य विपरीत हो ।’ वैकल्पिक सरकार गठनको कार्यबाट झन् अस्थिरता हुने तथा एजेण्डा सम्बोधनको कार्य अझै अनिश्चिततातर्फ धकेलिने ठाकुरले भनेका छन् ।
जसपा कै भट्टराई–यादव पक्षका सांसदहरुले प्रधानमन्त्री ओलीको विश्वासको मतको विपक्षमा मत दिएका थिए । आन्तरिक विवादले संसदीय दलमा समेत व्हीप जारी गर्न नसकेको जसपाको अनिर्णयले नयाँ सरकार गठन प्रकृयामा अवरोध सिर्जना हुँदै आएको छ ।
