काठमाडौँ । नेकपा एमालेका नेता माधवकुमार नेपालले नयाँ पार्टी खोल्ने अन्तिम तयारीमा रहेको बताएका छन् । आफूनिकट जनसंगठनको भर्चुअल भेलामा नयाँ पार्टी, नयाँ आन्दोलन विकास गर्नुको विकल्प नरहेको बताएका हुन् ।
‘आफू अन्तिम मुडमा पुगेको जानकारी नेता नेपालले आजको भेलामा गराउनु भयो,’ भेलामा सहभागी एक नेताले भने, ‘प्रधानमन्त्री ओली सुध्रिने, सच्चिने संकेत मिलेको छैन । उनले जेठ २ मा फर्कने भनेर वक्तव्यबाजी पनि गर्न सक्छन् । तर, उनको विगत हेर्दा सम्झौता पालना गर्ने कुरा खण्डित हुने देखिन्छ । त्यसैले अब आन्दोलन विकास गर्नुको विकल्प छैन ।’
जनसंगठनका नेताहरुले वार्ता गर्ने भए समय तोकेर प्रयत्न गरिनुपर्ने, नत्र अलग पार्टी निर्माणमा लाग्न नेताहरुले सुझाव दिएका थिए।
एमालले औपचारिक विभाजन उन्मुख देखिएको छ । पार्टी एकताका लागि भन्दै अध्यक्ष केपी शर्मा ओली र नेपाल समूहका नेताबीच वार्ता चलिरहेको छ ।
ओलीले नेपालसहितका ११ जनालाई पार्टी साधारण सदस्यसमेत नरहने गरी कारबाही गरेपछि एमालेभित्रको विवाद चर्किँदो छ ।
