काठमाडौं । नेपाल कम्युनिष्ट पार्टी(नेकपा)का अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीले निर्ममतापूर्वक लोकतन्त्रको हत्या गरेको आरोप लगाएका छन ।
संविधान बनाउँदा नै प्रधानमन्त्रीले संसद विघटन गर्न नसक्ने व्यवस्था गरिएकोमा संविधान मिचेर संसद विघटन गरेको उनको तर्क थियो । प्रधानमन्त्री ओलीको कदम असंवैधानिक भनि सर्वोच्च अदालतले फैसला गर्ने उनले विश्वास व्यक्त गरे । शुक्रबार नेपाल कम्युनिष्ट पार्टी (नेकपा)का अध्यक्ष प्रचण्ड र माधवकुमार नेपाल समुहको केन्द्रीय कमिटी बैठकको निर्णय तथा पार्टीको आगामी कार्यक्रमको बारेमा जानकारी दिन गरिएको पत्रकार सम्मेलनमा बोल्दै अध्यक्ष प्रचण्डले सर्वोच्च अदालतले संविधानको व्यवस्था अनुसार नै फैसला गर्ने भरोसा रहेको बताए ।अध्यक्ष प्रचण्डले सरकारको असंवैधानिक र निरंकुश कदका विरुद्ध शुक्रबारदेखि नै आन्दोलन थालेको बताउँदै समस्या समाधान नभए अझ सशक्त आन्दोलन गर्ने घोषणा गरे ।
अध्यक्ष प्रचण्डले बहुमत सदस्यको उपस्थिति र हस्ताक्षरमा केन्द्रीय कमिटी बैठक बसेको र निर्वाचन आयोगमा सशरिर उपस्थित हुन सक्ने भन्दै पार्टीको नाम, चुनाव चिन्ह, लोगो लगायत पार्टीको आधिकारिकता आयोगले आफुहरुलाई दिनुपर्ने दाबी गरे ।
सञ्चारकर्मीहरुको जिज्ञासाको उत्तर दिदैँ अध्यक्ष प्रचण्डले प्रधानमन्त्री ओलीसँग पहिले गरेका सहमतीको कार्यान्वयन गर्दै जाउँ अथवा महाधिवेशन अघि विशेष राष्ट्रिय सम्मेलनबाट पार्टीको समस्या हल गरौँ भन्ने प्रस्ताव राखेको तर प्रधानमन्त्रीले सुन्दै नसुनी संसद विघटन गरेको आरोप लगाए । सरकारलाई आफुहरुले सहयोग नगरेको भन्नेकुरा गलत भएको समेत अध्यक्ष प्रचण्डले बताए ।
