स्याङ्जा, १३ माघ ।
शिक्षा, स्वास्थ्य, रोजगारी, सुशासन लगायतका क्षेत्रमा काम गर्ने उद्देश्यले स्याङ्जाको आँधीखोलाका युवा संगठित भएका छन् । शनिबार भएको वृहत भेलाले हरि ढकालको अध्यक्षतामा युथ अफ आँधीखोला गठन गरेको छ ।
३१ सदस्यीय समितिको उपाध्यक्षमा दीपेन्द्र खड्का र पवनकाजी अधिकारी, महिला उपाध्यक्षमा शारदा शर्मा, सचिवमा एलपी ढकाल, सहसचिवमा भीमप्रसाद पौडेल र कोषाध्यक्षमा लीलाधर लामिछाने चयन भए ।
सहजीकरणमा युवराज पौडेल, रवीन्द्र क्षेत्री, कृष्ण खड्का र झलक लामिछाने छन् । समिति गठन भएकै दिन आर्थिक संकलन गरी युवाहरुले सहयोगसमेत हस्तान्तरण गरेका छन् ।
आँधीखोला– ५ का दृष्टिविहीन पदमबहादुर बिक, आँधीखोला– ६ ढाँडीखेत बस्ने रामकुमार बिक (लामा), आँधीखोला– ६ फापरथुमका शारीरिक अशक्त धनबहादुर बस्नेतलाई उनीहरुको घरमै पुगी खाद्यान्न, फलफूल लगायत सामग्री हस्तान्तरण गरेको सहजकर्ता युवराज पौडेलले जानकारी दिए ।
