वालिङ, ३० कात्तिक ।
भुमि व्यवस्था सहकारी तथा गरिवी निवारण मन्त्री पद्मा अर्यालले गण्डकी प्रदेश लोक संस्कृतिम अग्रणी प्रदेश रहेको वताएकी छन् । राष्ट्रिय लोक दोहरी प्रतिष्ठान स्याङ्जाद्धारा कलाकार कल्याणकारी कोष स्थापनार्थ आयोजना गरिएको वृहत सांस्कृतिक कार्यक्रमको उद्घाट गर्दै मन्त्री अर्यालले गण्डकी प्रदेशलाई लोक, कला र संस्कृतिको राजधानीको रुपमा लिएको बताएकी हुन् ।
लोक संस्कृतिले नेपालमा मात्र नभएर विश्वमा नेपाललाई परिचित बनाएको उल्लेख गर्दै मन्त्री अर्यालले कलाकार बन्न चाहनाले मात्र नभई कला र गला उत्तिकै आवश्यक पर्ने वताएकी छन् । कलाकारको श्रृजनामा ठूलो शक्ति रहेको वताउदै मन्त्री अर्यालले मूलुक परिवर्तनमा कलाकारको भूमिका उत्तिकै महत्वपूर्ण रहेको बताएकी छन् ।
कलाकारहरुले आफ्नो प्रतिभा मार्फत व्यक्ति, समाज र सिंगो देसलाई समृद्धि तर्फ उन्भूख गराउने वताउदै मन्त्री अर्यालले प्रतिष्ठानले कलाकारहरुको हितका निम्ति सुरु गरेको कल्याणकारी कोषको स्थापनामा आफ्नो पूर्ण सहयोग साथ र समर्थन रहने विश्वास व्यक्त गरिन् ।
कार्यक्रममा पूतलिबजार नगरपालिकाका प्रमुख सिमा क्षेत्री, कालीगण्डकी गाँउपालिकाका अध्यक्ष खिमबहादुर थापा, वालिङ उद्योग वाणिज्य संघका अध्यक्ष तथा प्रतिष्ठानका सल्लाहकार शोभाकान्त पौडेल लगायतले कलाकारहरुको हित र संरक्षणका लागि स्थापना गरिएको कोषको सफलताको शुभकामना व्यक्त गरेका थिए ।
प्रतिष्ठानका अध्यक्ष ऋषिराम डुम्रेको अध्यक्षतामा सम्पन्न कार्यक्रममा प्रथम उपाध्यक्ष नेत्र खड्काले स्वागत मन्तव्य व्यक्त गरेका थिए । भने कार्यक्रम राष्ट्रिय लोक तथा दोहरी गित प्रतिष्ठान नेपालका केन्द्रीय सदस्य घनश्याम रिजालले सन्चालन गरेका थिए ।
कार्यक्रममा जिल्लाका अग्रज कलाकार पुरुषोत्तम न्यौपाने र गोपाल जि.टि.लाई सम्मान गरिएको थियो । भने कल्याणकारी कोषका लागि सहयोग गर्ने सहयोग दाता कलाकार र सहयोगीहरुलाई सम्मान पत्र प्रदान गरिएको थियो । कार्यक्रममा राष्ट्रिय कलाकारहरुको प्रस्तुती रहेको थियो । कार्यक्रम वालिङ खेलमैदानमा गरिएको थियो ।
