साधारण सभामा क्रियाशिल पत्रकार सम्मान ग्रहण गर्दै पत्रकार श्रीकृष्ण सिग्देल
स्याङ्जा, कार्तिक १५ – रोयल बचत तथा ऋण सहकारी संस्था लिमिटेडको २४औं वार्षिक साधारण सभा शुक्रबार पुतलीबजारमा सम्पन्न भएको छ। सहकारीका संस्थापक अध्यक्ष र मुक्तिनाथ कृषि कम्पनी लिमिटेडका अध्यक्ष सिताराम काफ्लेको प्रमुख आतिथ्यतामा सम्पन्न सभामा देशको आर्थिक स्थायित्वका लागि सहकारी र कृषिक्षेत्रबीचको सहकार्य अपरिहार्य रहेको प्रमुख अतिथी काफ्लेले वताएका छन् ।
प्रमुख अतिथि काफ्लेले उद्घाटन मन्तव्यका क्रममा सहकारी आन्दोलनलाई कृषिसँग जोडेर अघि बढाउनुपर्ने आवश्यकता औंल्याउँदै भने, “देशको प्रमुख सम्भावना कृषिमा नै छ। कृषिको विकासले रोजगारी सिर्जना गर्छ, त्यसले बेरोजगारी घटाउँछ र युवा पुस्तामा देखिएको निराशा तथा असन्तुष्टिको मूल कारण पनि यही बेरोजगारी हो,” उनले भने।
उनले रोयल सहकारीको प्रारम्भिक इतिहास स्मरण गर्दै देशभर शाखा विस्तार गर्ने लक्ष्यसहित सुरु गरिएको संस्थाले विभिन्न चुनौती पार गर्दै अहिले स्थानीय तहमा स्वायत्त रूपमा सवै रोयल अव्वल सावित भएकोमा खुसी व्यक्त गरे ।
त्यस्तै, मुक्तिनाथ विकास बैंकका पूर्व प्रमुख कार्यकारी अधिकृत तथा मुक्तिनाथ कृषि कम्पनीका सिईओ भरतराज ढकालले देशभर केही सहकारीहरू अनुशासन र सुशासनमा नचलेका कारण सम्पूर्ण सहकारी क्षेत्रकै प्रतिष्ठामा आँच आएको बताए। उनले भने, “जबसम्म आर्थिक क्षेत्र सुदृढ हुँदैन, तबसम्म देश र राजनीतिक संस्थाहरूको संस्थागत विकास पनि सम्भव हुँदैन।”
कार्यक्रममा संस्थाका पूर्व अध्यक्ष भरत लम्साल, नारायण प्रसाद पौडेल, मुक्तिनाथ विकास बैंकका सिईओ पद्युम्न पोख्रेल, पूर्व सञ्चालक रामप्रसाद पोख्रेल, जिल्ला बचत तथा ऋण सहकारी संघ स्याङ्जाका अध्यक्ष लोकनाथ शर्मा, तथा नेपाल पत्रकार महासंघ स्याङ्जाका पूर्व अध्यक्ष ओमप्रकाश शर्मालगायतले शुभकामना मन्तव्य दिएका थिए।
सहकारीको २४औं वार्षिक प्रतिवेदन प्रस्तुत गर्दै अध्यक्ष विष्णुप्रसाद पोख्रेलले संस्थाले हालसम्मको यात्रामा आर्थिक अनुशासन, पारदर्शिता र सदस्यमुखी सेवा प्राथमिकतामा राख्दै उल्लेख्य प्रगति गरेको जानकारी दिए। उनका अनुसार हाल संस्थाको शेयर पूँजी ३ करोड ६८ लाख ७ हजार ४ सय रुपैयाँ पुगेको छ भने जगेडा कोषमा एक करोड ५४ लाखभन्दा बढी रकम जम्मा भएको छ। संस्थाले हालसम्म जम्मा २३ करोड ५१ लाख १६ हजार ५० रूपैंया निक्षेप संकलन गरेको र सोही आधारमा १८ करोड ९५ लाख ७१ हजार ९ सय ९९ रुपैयाँ लगानी विस्तार गरिएको प्रतिवेदनमा उल्लेख गरिएको छ।
साधारण सभामा सचिव प्रकाश डोटेल, कोषाध्यक्ष दिपेन्द्रमान श्रेष्ठ, लेखा तथा सुपरिवेक्षण समितिका संयोजक वद्रीप्रसाद श्रेष्ठ, र कर्जा उपसमितिका संयोजक कुलानन्द लम्सालले आ–आफ्ना प्रतिवेदन प्रस्तुत गरेका थिए।
कार्यक्रममा जिल्लामा क्रियाशील पत्रकारितामा योगदान पुर्याएका नेपाल पत्रकार महासंघ स्याङ्जाका निवर्तमान अध्यक्ष श्रीकृष्ण सिग्देललाई दोसल्ला, नगद र प्रमाणपत्रसहित सम्मान गरिएको थियो। त्यस्तै, उत्कृष्ट कारोवार अनुशासन कायम गर्ने सदस्य विनोदकुमार अर्याल र जोजुमाया थापालाई पनि विशेष सम्मान प्रदान गरिएको थियो।
कार्यक्रममा बोल्ने वक्ताहरूले सहकारीको जिम्मेवार भूमिका आर्थिक स्वावलम्बन र स्थानीय विकासको मूल स्रोतका रूपमा लिएर आगामी वर्षको कार्य योजना गराउन सुझाव दिएका थिए ।
