स्याङ्जा, ४ फागुन । प्रतिनिधिसभा सदस्य निर्वाचन २०८२ को मिति नजिकिँदै जाँदा स्याङ्जा–१ मा चुनावी माहोल नेपाली काँग्रेसका लागि थप उत्साहित बनेको छ। स्वतन्त्र उम्मेद्वार मनोज नेपाली दर्जी ले नेपाली काँग्रेसका उम्मेद्वार भरतराज ढकाल लाई समर्थन गरेपछि काँग्रेस पक्षमा नयाँ ऊर्जा थपिएको हो।
आँधीखोला गाउँपालिका–१ पञ्चमूलमा भएको कार्यक्रममा काँग्रेस उमेदवार ढकाललाई समर्थन गरेपछि दर्जीले आफूले उठाउँदै आएका मुख्य एजेण्डा ढकालले आत्मसात् गरेको बताए।
गरिबी हटाउने, रोजगारी सिर्जना गर्ने र उत्पादन बढाउने अभियानलाई सफल बनाउन ढकाललाई जिताउनुपर्ने उनले आग्रह गरे। उनले भने, “संघीय संसदमा नीति बनाउने सक्षम व्यक्ति आवश्यक छ। ढकालले स्याङ्जाको आवाज बलियो रूपमा उठाउन सक्छन्।”
समर्थन घोषणा भएपछि कार्यक्रममा सहभागी कार्यकर्ता र स्थानीयवासीहरू उत्साहित देखिएका थिए। ढकालले पनि बदलिएको नेतृत्वले समाजमा सकारात्मक परिवर्तन ल्याउने अठोट व्यक्त गरे। उनले रोजगारी, आर्थिक विकास र पूर्वाधार विस्तारलाई प्राथमिकतामा राखेर काम गर्ने प्रतिबद्धता जनाए।
हाल ढकालले स्याङ्जा–१ का विभिन्न गाउँपालिका र नगरपालिकामा घरदैलो कार्यक्रमलाई तीव्र बनाएका छन्। स्वतन्त्र उम्मेद्वारको समर्थनपछि उनको चुनावी अभियान थप मजबुत बनेको कार्यकर्ताहरूको भनाइ छ। निर्वाचन आउन केही दिन मात्र बाँकी रहँदा स्याङ्जाका दुवै क्षेत्रमा चुनावी सरगर्मी दिनप्रतिदिन बढ्दै गएको छ।
