स्याङ्जा १४ पौष । ‘हाम्रो गौरव, हाम्रो शान, वालिङ महोत्सव हाम्रो पहिचान’ भन्ने मूल नाराका साथ नवौं वालिङ महोत्सव–२०८२ यही माघ १४ गतेदेखि २५ गतेसम्म वालिङ नगरपालिका–८ स्थित वालिङ खेलमैदानमा आयोजना हुने भएको छ।
प्रत्येक दुई वर्षमा आयोजना हुँदै आएको यो महोत्सव यसपटक प्रादेशिक कृषि, पर्यटन, सांस्कृतिक तथा औद्योगिक व्यापार मेलाका रूपमा सञ्चालन गरिने आयोजक वालिङ उद्योग वाणिज्य संघले सोमवार वालिङमा आयोजना गरेको पत्रकार सम्मेलनमा जानकारी दिएको छ ।
२०६३ सालदेखि निरन्तर सञ्चालन हुँदै आएको वालिङ महोत्सव स्याङ्जा जिल्लाकै सबैभन्दा ठूलो र गण्डकी प्रदेशमै सर्वाधिक दर्शकले अवलोकन गर्ने मेलाको रूपमा परिचित छ। आठौं संस्करणको अपार सफलतापछि आयोजना हुन लागेको नवौं महोत्सवले समृद्ध वालिङको आर्थिक, सामाजिक र सांस्कृतिक विकासमा थप टेवा पुर्याउने अपेक्षा गरिएको पत्रकार सम्मेलनमा आयोजकले वताएका छन् ।
महोत्सवमा करिब ३५० व्यापारिक स्टल, ६० प्रायोजक संस्था, कृषि, हस्तकला, सेवा तथा औद्योगिक स्टलहरू रहनेछन्। सुन्तला, ताजा तरकारी, अदुवा, कफी, जडीबुटी, पशुपंक्षी पालन तथा कृषिमा आधारित उद्योगहरूको प्रदर्शनीमार्फत स्थानीय उत्पादनको प्रवर्द्धन गरिनेछ। साथै जिल्लाभित्रका पर्यटकीय गन्तव्यहरूको फोटो प्रदर्शनी र होमस्टे प्रवर्द्धन कार्यक्रम पनि समावेश गरिने जनाएका छन ।
महोत्सवको आकर्षणका रूपमा स्याङ्जा डान्स आइडल सिजन–४, मम्मी डान्स, टिकटक, भजन, रत्यौली प्रतियोगिता, लोक–दोहोरी कार्यक्रम, कृषि तथा पशुपंक्षी प्रदर्शनी, बाल उद्यान, अटोमोबाइल्स र राष्ट्रिय ख्यातीप्राप्त कलाकारहरूको प्रस्तुति रहने आयोजकले जनाएको छ। महोत्सव अवधिभर महोत्सव परिसरमा निःशुल्क वाइफाइ सेवा समेत उपलब्ध गराइने भनिएको छ ।
महोत्सव अवधिभर ३ लाखभन्दा बढी दर्शकले अवलोकन गर्ने र १० करोड रुपैयाँभन्दा बढीको आर्थिक कारोबार हुने अनुमान गरिएको छ। महोत्सवबाट करिब १ करोड ६८ लाख रुपैयाँ आम्दानी, खर्च कटाएर ५३ लाख रुपैयाँभन्दा बढी बचत गर्ने लक्ष्य राखिएको वालिङ उद्योग वाणिज्य संघका अध्यक्ष चेतनारायण श्रेष्ठले जानकारी दिए ।
पत्रकार सम्मेलनमा नेपाल पत्रकार महासंघ स्याङ्जाका अध्यक्ष प्रदीप कोइरालाले वालिङ महोत्सवले हरेक संस्करणमा सफलता हासिल गर्दै आए पनि पछिल्ला वर्षहरूमा यसको मौलिक पहिचान हराउँदै जानु चिन्ताको विषय भएको धारणा राखेका छन् । नवौं महोत्सवमा विगतका अनुभवहरूको समीक्षा गर्दै स्थानीय संस्कृति, परम्परा र पहिचान झल्किने कार्यक्रम तथा प्रदर्शनीलाई प्राथमिकता दिनुपर्ने उनको सुझाव थियो।
वालिङ उद्योग वाणिज्य संघका पूर्व अध्यक्ष शोभाकान्त पौडेलले वालिङको समग्र विकास र व्यापारीको हितलाई केन्द्रमा राखेर संघले आयोजना गर्दै आएको महोत्सवले जिल्लामा रहेका विभिन्न सम्भावनाहरू उजागर गर्ने गरेको बताए। महोत्सवले विकासका नयाँ गोरेटोहरू निर्माण गर्नुका साथै उद्योग, व्यापार र पर्यटन प्रवर्द्धनमा महत्वपूर्ण भूमिका खेलेको पौडेलको भनाइ थियो।
त्यसैगरी आयोजक समितिका अध्यक्ष समेत रहेका संघका अध्यक्ष चेतनारायण श्रेष्ठले वालिङ महोत्सव स्याङ्जावासीका लागि हरेक दुई वर्षमा आउने उत्सव भएको उल्लेख गर्दै महोत्सव सुरु हुनु अघि नै वालिङ बजारलाई ‘दुलहीझैं सिंगारेर’ उत्सवमय बनाइने जानकारी दिए। महोत्सवलाई थप व्यवस्थित, आकर्षक र अनुशासित बनाउन विभिन्न समिति तथा उपसमितिहरू सक्रिय रूपमा परिचालित भइरहेको समेत जानकारी दिए ।
पत्रकार सम्मेलनमा महोत्सवको समग्र तयारी, कार्यक्रम, स्टल व्यवस्थापन, सांस्कृतिक प्रस्तुतिहरू तथा प्रचारप्रसारका विषयमा प्रचारप्रसार संयोजक सुशील खनालले विस्तृत विवरण दिएका थिए । पत्रकार सम्मेलनको सञ्चालन महासचिव रमेश अर्यालले गरेका थिए भने उपाध्यक्ष खगेन्द्र अर्यालले धन्यवाद व्यक्त गरेका थिए ।
